Dáýren Abaev Qordaıdaǵy oqıǵa jaıly: Oqıǵanyń sebepteri tereńde jatýy múmkin

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev qazaqtar men dúngenderdiń arasyndaǵy qaqtyǵysqa qatysty pikir bildirdi, dep habarlaıdy QazAqparat tilshisi.

«Іshki ister mınıstrligi oqıǵanyń hronologııasyn jasady. Onyń sebebi – turmystyq sıpatqa ıe ekeni anyqtaldy. Olar mámilege kelgen. Alaıda messendjerlerde zorlyq-zombylyqqa shaqyrǵan, emotsııaǵa toly pikirmen súıemeldengen vıdeonyń kesirinen syrttan kisiler iske aralasyp ketken. Dese de buny kezdeısoq qaqtyǵys dep aıtýǵa taǵy kelmeıdi. Bálkim, onyń sebepteri tereńde jatýy da múmkin. Mine, sol úshin qatań kadrlyq sheshimder qabyldandy. Oblysta ákim ǵana emes, kúsh qurylymdarynyń basshylary da aýysty. Іstiń barlyq mán-jaıyn qazir arnaıy qurylǵan komıssııa anyqtap jatyr», - dedi Dáýren Abaev «Ashyq dıalog» baǵdarlamasynda.

Mınıstr óz sózinde adamdardyń ólimin, zorlyq-zombylyqty eshteńe aqtaı almaıtynyn jetkizdi.

«Bılik kinálilerdi qazaq nemese dúngen dep bólmeıdi. Olardyń bári de – Qazaqstan Respýblıkasynyń azamattary. Zań aldynda olar teń jaýap beredi», - dedi ol.