Dáýren Abaev Qordaı oqıǵasyna qatysty pikirtalas týraly: Bul - qalypty úrdis

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev «Ashyq dıalog» baǵdarlamasynda «Qordaıdaǵy oqıǵa qoǵamdy ekige bólip jiberdi me?» degen suraqqa da jaýap berdi, dep habarlaıdy QazAqparat tilshisi.

«Qoǵam ekige jarylyp ketti deý – artyqtaý. Iá, adamdar sóz talastyrady, sebebi árkimniń óz oıy bar. Bul – qalypty úrdis. Biraq qoǵamda ártúrli máselege qatysty pikirtalas júrip jatatynyn túsiný kerek. Biraq barlyq emotsııa men kóńil tolqynysyn qoıa tursaq, Qazaqstan azamattarynyń kóbi mynadaı qaǵıdatty qoldaıtyn sııaqty: birinshi, kezekte bizdiń elde bári de beıbitshilik pen kelisimniń bolǵanyn qalaıdy. Ekinshiden, bolǵan oqıǵanyń shynaıy sebebin bilgisi ári ony rettegisi keledi. Úshinshiden, adamdar qaqtyǵysqa kinálilerdiń anyqtalǵanyn jón dep biledi. Tórtinshiden, adamdar mundaı oqıǵanyń endi qaıtalanǵanyn qalamaıdy. Bul – eń basty másele», - dedi mınıstr.

Dáýren Abaev pikirtalastardyń shuǵyl málimdemelerge ulasyp ketýi múmkin ekenin aıtyp ótti.

«Bálkim, buryn aıtqanymyzdaı bizde belgili bir dárejede ashyq pikir talastyrý da damymaı turǵan bolar. Adamdar emotsııamen bir-birin jábirleýge deıin barady. Keı jaǵdaıda kez kelgen máselege baılanysty, kez kelgen salanyń mamany retinde pikir bildirip otyrǵan «sarapshylardyń» da otqa maı quıyp otyratyny bar. Árkim óz sózin aıtyp qalǵysy keledi. Ókinishke qaraı, keıbireý tipti ashyqtan-ashyq «haıp ustaǵysy» keledi. Buǵan qarsy shara qoldaný múmkin emes sekildi. Sóz erkindigi - osy bolar», - dedi Dáýren Abaev.