Dáýren Abaev qazaq kınosynyń damýyna qatysty suraqtarǵa jaýap berdi

NUR-SULTAN. QazAqparat - Básekege qabiletti jáne suranysqa ıe kıno ónimin jasaý, «Qazaqfılm» kınostýdııasyn jańǵyrtý jáne kınematografııa salasyndaǵy zańnamany jetildirý. Osy jáne basqa da máseleler búgin QR Mádenıet jáne sport mınıstri Dáýren Abaevtyń otandyq kınorejısserlermen kezdesýinde talqylandy, dep habarlaıdy QazAqparat.

Mınıstrlik málimetine sáıkes, kezdesýdiń basty suraqtarynyń biri – konkýrstyq irikteýge qatysýshylarǵa arnalǵan qarjylyq turaqtylyq talaby. Sala ókilderiniń aıtýynsha, bul kóptegen kompanııanyń memlekettik qoldaýǵa ıe bolýyna kedergi keltiredi.

«Bul talapty Qarjy mınıstrligi berdi. Qazirgi ýaqytta kınoındýstrııa ókilderiniń paıdasyna máseleni qarastyryp jatyrmyz. Bizdiń taraptan kıno men jalpy osy salany damytý úshin barlyq kúsh - jiger jumsalady», - dedi Dáýren Abaev.

Bıyl konkýrstyq irikteý qorytyndysy boıynsha 62 kınojoba memlekettiń qarjylandyrýyna ıe boldy. Bul rette saraptamalyq keńestiń quramy 80% jańartyldy. Konkýrsty ótkizýdiń ashyqtyǵyn qamtamasyz etý úshin qorǵaýdyń barlyq protsesi onlaın-translıatsııa arqyly júrgizildi.

«Eger 2020 jyly memleket 39 jobany qoldasa, bıyl eki ese kóp – 62 kartına qarjylandyryldy. Pıtchıng nátıjelerine saı irikteýden ótkenderdiń kópshiligi – jas rejısserler. Jáne olar kıno álemine alǵash qadam jasaǵandar. Biz jas mamandardyń jarqyrap tanylýlaryna múmkindik berýimiz kerek», - dedi mınıstr.

Sonymen qatar kezdesýge qatysýshylar anımatsııalyq fılmder óndirisi týraly taqyrypty da qozǵady. Atap aıtqanda, kınostýdııa ókilderi ınternet-keńistikte qazaq mýltfılmderiniń joǵary tanymaldyǵyn atap ótti.

«Men osyǵan deıin de balalarǵa sapaly jáne kórýge laıyqty anımatsııalyq fılmder qajet ekenin aıtyp kelemin. Bıylǵy jyly «Qazaqfılm» kınostýdııasynyń bazasynda «Qazaqanımatsııa» shyǵarmashylyq birlestigi qurylady. Jyl sońyna deıin keminde on pılottyq anımatsııalyq jobany usyný josparlanyp otyr. Memleket anımatsııa salasyndaǵy kreatıvti ıdeıalar men jobalardy qoldaýǵa daıyn. Bul jumys óz jemisin beretinine jáne básekege qabiletti otandyq ónim alatynymyzǵa senimdimin», - dep atap ótti mınıstr.

Budan bólek, kıno salasyndaǵy qoldanystaǵy zańnamany ózgertý máselesi kóterildi. Dáýren Abaevtyń aıtýynsha, Mádenıet jáne sport mınıstrligi kásibı mamandar men tájirıbeli sarapshylar qaýymdastyǵymen birlesip, zańnamalyq bazaǵa túzetýler men usynystar engizý baǵytynda jumys isteýge daıyn.

Aıta ketý kerek, is-sharaǵa 70-ten astam adam qatysty, olardyń ishinde Doshan Joljaqsynov, Tuńǵyshbaı Jamanqulov, Rashıd Nuǵmanov, Qanat Tórebaı jáne basqalary bar.