Dáýren Abaev HQKO qyzmetkerleriniń jalaqysyn kóterýge kúsh salmaq

ASTANA. QazAqparat - QR Aqparat jáne kommýnıkatsııalar mınıstrligi elimizdegi halyqqa qyzmet kórsetý ortalyqtary qyzmetkerleriniń jalaqysyn kóterý usynysyn qoldap otyr, dep habarlaıdy QazAqparat.

«HQKO qyzmetkerleriniń jalaqysy joǵary emes. Ókinishke oraı ol elimiz boıynsha ortashadan tómen. Biz bul máselemen de aınalysyp jatyrmyz. Bul másele Úkimet deńgeıinde sheshiledi», - dedi QR Aqparat jáne kommýnıkatsııalar mınıstri Dáýren Abaev «Azamattarǵa arnalǵan Úkimet» memlekettik korporatsııasynyń jumysyn BAQ ókilderine tanystyrýǵa arnalǵan sharada.

Onyń aıtýynsha, Qazaqstan HQKO-lary álemde mundaı mekemeler arasynda jumys kúni uzaqtyǵy boıynsha kóshbasshylyq orynǵa ıe.

«Qazirgi ýaqytta memlekettik korporatsııa tańerteńgi 9-dan keshki 8-ge deıin jumys isteıdi. Al Eýropada mundaı mekemeler tańerteńge 9-dan keshki 5 nemese 6-ǵa deıin ǵana qyzmet kórsetedi. Olardyń kópshiligi kóptegen qujattardy qabyldamaıdy da», - dedi mınıstr.

Shara barysynda «Azamattarǵa arnalǵan Úkimet» memlekettik korporatsııasynyń basqarma tóraǵasy Abylaı Ospanov búgingi kúni elimizde memlekettik korporatsııanyń 350 front-keńesi jáne 630-dan astam bek-keńsesi jumys isteıtindigin atap ótti. Olarda 22 myńǵa jýyq qyzmetker bar. ótken jyly memlekettik korporatsııa 37 mıllıonnan astam qyzmet, onyń 24,5 mıllıony elektrondy formatta kórsetildi.