Dáýren Abaev «Tsıfrlyq Qazaqstan» baǵdarlamasynyń 5 baǵytyn atady

ASTANA. QazAqparat - «Tsıfrlyq Qazaqstan» memlekettik baǵdarlamasy negizgi baǵyt 5 boıynsha júzege asyrylady. Bul týraly búgin Úkimet otyrysynda atalǵan baǵdarlamanyń qorytyndy nusqasyn tanystyrǵan QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat.

«Qujat negizgi 5 baǵytty qamtıdy. Birinshisi - «Ekonomıka salalaryn tsıfrlandyrý». Bul eńbek ónimdiligin ósirý jáne kapıtaldandyrýdy arttyrý maqsatynda serpindi tehnologııalardy paıdalaný arqyly ekonomıkanyń dástúrli salalaryn túrlendirýdi kózdeıdi. Ekinshisi - «Tsıfrlyq memleketke kóshý». Bul rette sóz halyq pen bızneske memlekettik qyzmetterdi olardyń qajettiligin seziný joldary arqyly jańa sapaly deńgeıge kóterý jaıynda bolyp otyr», - dedi Dáýren Abaev.

Onyń aıtýynsha, úshinshi baǵytta «Tsıfrlyq Jibek jolyn júzege asyrý» kózdeledi. Atalǵan baǵyt málimetterdi berý, saqtaý jáne óńdeýdiń joǵary jyldamdyǵyn jáne ınfraqurylymynyń qorǵalýyn damytý júzege asyrylady. Tórtinshisi - «Adam kapıtalyn damytý». Bul baǵytta «bilim ekonomıkasyna» kóshýdi qamtamasyz etý úshin kreatıvti qoǵam qurý júrgiziledi.

«Besinshi «Innovatsııalyq ekojúıe qurý» baǵytynda bıznes, ǵylymı orta jáne memleket arasyndaǵy turaqty kólbeý baılanystarmen tehnologııalyq kásipkerlik pen ınnovatsııany damytý úshin jaǵdaı qalyptastyrý jaıynda sóz bolyp otyr», - dedi Dáýren Abaev.

Mınıstrdiń dereginshe, atalǵan 5 baǵyt aıasynda 17 bastama men 120 is-shara josparlanǵan.

«Olardyń bir bóligi taıaý jyldardyń ishinde naqty nátıjelerge qol jetkizýge baǵyttalǵan. Al qalǵandary bolashaqtaǵy ekonomıkanyń salasy retinde tsıfrlyq sektorǵa negiz qalaıdy. Onyń áseri kelesi onjyldyqta baıqalady», - dedi ol.