Dáýren Abaev bolashaq jýrnalısti jumysqa ornalastyrýǵa múmkindik beretin baıqaý ótkizbek

ASTANA. QazAqparat - Elimizdiń joǵary oqý oryndarynyń jýrnalıstka fakýltetinde oqıtyn stýdentter arasynda jumysqa ornalasýǵa múmkindik beretin baıqaý uıymdastyrylady. Bul týraly búgin Medıa bilim berýdi damytý máseleleri jónindegi vedomstvoaralyq keńeste QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat tilshisi.

«Árıne, qazirgi ýaqytta joǵary oqý oryndary berip jatqan bilimge kóńilimiz tolady. Degenmen, kóp jaǵdaı stýdentterdiń ózderine de baılanysty ekendigin túsinemiz. Eger bazalyq dúnıelerdi, pánderdi oqytýshylar úıretetin bolsa, qalǵan bilim men daǵdyny derbes alý kerek. Onyń ústine olardyń mundaı múmkinshilikteri de bar», - dedi ol.

Osy rette Dáýren Abaev Aqparat jáne kommýnıkatsııalar mınıstrligi jýrnalıstıka salasyndaǵy bilim berýdi damytý máselelerin talqylaýǵa jáne qajetti járdem berýge daıyn ekendigin aıtty.

«Qazir biz máselelerdi qarastyryp, talqylaýǵa daıynbyz. Bir aıdan keıin «Úrker» syılyǵyn tapsyrar kezde sol ýaqytqa daıyn bolsaq, baıqaý jarııalaımyz. Bylaı jasaıyq, baıqaý bolady jáne bas redaktorlar, telearnalardyń, radıolar men gazetterdiń basqarma ókilderinen jasaqtalǵan tóreshiler baıqaýdan ótken úzdik stýdentti jumysqa alýǵa mindetteme alady. Menińshe, bul shynaıy ári jaqsy baıqaý bolar edi. Stýdent joǵary oqý ornyn bitirgennen keıin jumysqa ornalasady. Mine, osyndaı qaıyrymdy is jasaı alamyz. Konkýrstyń krıterıılerin ázirleý qajet», - dedi mınıstr.