Dáýren Abaev Baıqońyr jaıly: Qazaqstan ǵaryshynyń dańqty paraqtary áli alda

ASTANA. QazAqparat - QR Aqparat jáne kommýnıkatsııalar mınıstri Dáýren Abaev «Soıýz FG» zymyrantasyǵyshynyń apatqa ushyraýy men jalpy Baıqońyr ǵarysh aılaǵynyń Qazaqstanǵa paıdasy týraly pikirimen bólisti, dep habarlaıdy QazAqparat tilshisi.

«Eń aldymen, Tótenshe jaǵdaılar komıteti men QR Qorǵanys jáne aeroǵarysh ónerkásibi mınıstrligi qoǵamǵa jedel túrde osy oqıǵa týraly aqparat bergenin aıta ketý kerek. Jaǵarmaıdyń negizgi salmaǵy meniń bilýimshe,  47-48 shaqyrym bıiktikte janyp ketken. Jerge tek suıyqtyqtyń qaldyǵy túsken. Bul jerde negizinen kerosın týraly aıtylyp otyr. Anyqtalǵanyndaı, zattektiń ruqsat etilgen kontsentratsııasynyń artyp ketý jaǵdaıy joq. Radıatsııalyq ahýal da qalypty. Meniń bilýimshe, topyraqqa laboratorııalyq zertteý júrgizilýde. Munyń bári de halyqqa jarııalanatyn bolady», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Baǵdarlamany júrgizip otyrǵan tilshi Baıqońyrdyń paıdasy respýblıkamyzdyń múddesine qanshalyqty jumys istep jatqany týraly el ishindegi kúdikke toly áńgimege qatysty mınıstrdiń pikirin surady.

«Bilesiz be, Baıqońyrdan bas tartý - Qazaqstan úshin úlken strategııalyq qatelik bolar edi. Bul jerde birneshe sebep bar. Men reseılik tarap jyl saıyn jalǵa alǵany úshin tóleıtin tólemdi esepke alyp, onyń bas paıda retinde aıtyp otyrǵan joqpyn. Bul - 40 mlrd teńge shamasyndaǵy soma. Ol - eń mańyzdy faktor emes. Baıqońyrdyń arqasynda jahandyq ǵarysh ındýstrııasynda jetekshi tehnologııalarǵa ıe bolyp otyrmyz. Búgingi tańda Qazaqstan spýtnıgi bar jer jahandaǵy 37 memlekettiń biri bolyp otyr. Spýtnıktik málimetter negizinde kóp salanyń tsıfrlandyrylýy júzege asyrylady», - dedi Dáýren Abaev.

Mınıstr óz sózinde atap aıtqanda, geodezııa, aýyl sharýashylyǵy tsıfrlandyrylyp, osy jumystyń bári Baıqońyrda atqarylyp  jatqanyn aıta ketti.

«Biz Baıqońyr ózimizdiń ulttyq ıgiligi ekenin umytpaýymyz kerek. Toqsanynshy jyldary shynynda da Baıqońyrdy jaýyp tastaý kerek pe degen másele de kóterilgen. Alaıda Memleket basshysy Baıqońyrdy saqtaı otyryp, barynsha tabysty túrde qoldanýǵa baryn saldy.

 Sóz sońynda aıtarym, Baıqońyr - búkil álemge belgili brend. Baıqońyrdyń arqasynda Qazaqstan ǵaryshynyń dańqty paraqtary áli de alda degen úmittemin», - dedi Dáýren Abaev.

Esterińizge sala keteıik, 11 qazanda 14 saǵat 40 mınýt 15 sekýndta Baıqońyr ǵarysh aılaǵynyń Gagarın start alańynan orbıtaǵa basqarylatyn kóliktik «Soıýz MS-10» kemesin alyp shyǵýy tıis «Soıýz FG» zymyrantasyǵyshy ushyryldy. Biraq start berilgen soń birneshe mınýttan keıin Roskosmos saıtyndaǵy tikeleı kórsetilim úzilip, dıktor «zymyrantasyǵyshtyń apatqa ushyraǵanyn» habarlaǵan edi.