Dáýren Abaev Bala asyrap alý agenttigi týraly pikir bildirdi

NUR-SULTAN. QazAqparat - QR Aqparat jáne qoǵamdyq damý mınıstri Dáýren Abaev bala asyrap alý agenttigin qurý týraly pikir bildirdi, dep habarlaıdy QazAqparat tilshisi.

«Bul taqyrypta pikirtalas kóp. Tipti, emotsııa kóbirek der edim. Eń qıyny, bul taqyrypta tájirıbesi joq adamdar belsendi bop shyǵa keldi. Bir jaǵynan qylmysqa qamqorlyq jasaıdy dep depýtattardy aıyptap, ekinshi jaǵynan agenttikti sheteldikterge bala satýdaǵy alypsatar kúdigine ildi», - dedi mınıstr «Habar» arnasyndaǵy «Otkrytyı dıalog» baǵdarlamasynda.

Onyń aıtýynsha, bul pikirlerdiń esh negizi joq.

«Eń aldymen, jetim balalarmen memleket aınalysýy tıis. Ekinshiden, memleket bul mindetti azamattyq qoǵamǵa tabystaýy tıis. Munda eki taraptyń da balalar taǵdyryna beı-jaı qaramaıtynyn túsingen jón. Barlyǵy balalardyń jaǵdaıy jaqsy bolǵanyn qalaıdy», - dedi ol.

Sonymen birge, vedomstvo basshysy elimizde 5 myń balanyń qaraýsyz qalǵanyn, azamattyq qoǵamnyń asyrap alý protsesin uıymdastyrýǵa kómek kórsetkisi keletinin jetkizdi.

«Eń bastysy, barlyǵy ashyq, taza, balalar úshin tıimdi bolýy qajet. Meniń bilýimshe, agenttik qazir pılottyq rejimde jumys istep tur. Úkimet pen jergilikti bılik tarapynan olarǵa barlyq kómek kórsetilgen jáne agenttik kóptegen azamattardyń bala asyrap alýyna kómektesti», - dedi D. Abaev.