Dáýren Abaev «Azamattarǵa arnalǵan úkimet» memkorporatsııasynyń qyzmetkerlerin marapattady

ASTANA. QazAqparat - Búgin Qazaqstan Respýblıkasynyń Aqparat jáne kommýnıkatsııalar mınıstri Dáýren Abaev «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamyn qurýǵa eleýli úles qosqan memlekettik qyzmetshilerdi marapattaý sharasyna qatysty, dep habarlaıdy vedomstvo baspasóz qyzmeti.

Mınıstr atap ótkendeı, bul saltanatty shara vedomstvonyń osy jylǵy jumysynyń arqaýy bolǵan - Táýelsizdiktiń 25 jyldyǵy qarsańynda ótkizilýde.

«Táýelsizdik - halqymyzdyń eń asyl qundylyǵy. Ony nyǵaıtý - Elbasynyń memlekettik baǵdarynyń negizi. Osy baǵdardyń eń mańyzdy salalarynyń biri - azamattarǵa qyzmet etetin memleketti qurý. Osy mindetti júzege asyrýda «Azamattarǵa arnalǵan úkimet» aıryqsha ról atqarady», - dedi Dáýren Abaev.

«Azamattarǵa arnalǵan úkimet» memlekettik korporatsııasy «100 naqty qadam» Ult josparyna sáıkes qurylǵan bolatyn. Ol aǵymdaǵy jylǵy 7 sáýirden bastap iske qosyldy. Memkorporatsııa quramyna «Jer kadastrynyń ǵylymı-óndiristik ortalyǵy», «Jyljymaıtyn múlik ortalyǵy», «Zeınetaqy tóleý jónindegi memlekettik ortalyq» jáne «Halyqqa qyzmet kórsetý ortalyǵy» kirdi. Qazirgi ýaqytta jalpy memqyzmettiń tizbesinde bolǵan 739 qyzmet túriniń 530-yn azamattar Memkorporatsııa arqyly ala alady. Osy jyldyń mamyr aıynda ótken Vedomstvoaralyq komıssııa otyrysynyń hattamasy boıynsha taǵy 53 memqyzmet Memkorporatsııaǵa beriledi.