Dáýren Abaev Áýezov teatry men Óner akademııasynyń jaǵdaıyna alańdaýshylyq bildirdi

NUR-SULTAN. QazAqparat – QR Mádenıet jáne sport mınıstri Dáýren Abaev M.Áýezov atyndaǵy Qazaq ulttyq drama teatrynyń jaǵdaıyna alańdaýshylyq bildirdi, dep habarlaıdy QazAqparat tilshisi.

«Keıbir respýblıkalyq mádenıet uıymdary ǵımarattarynyń tehnıkalyq jaǵdaıy tómen.

Oǵan ózim kýá boldym. Ózderińiz de habardar shyǵarsyzdar, biz qazir mınıstrlikke qarasty barlyq uıymdardy aralap júrmiz. Basty maqsatymyz – jaǵdaıǵa tolyqqandy qanyǵyp, problemanyń bárin aıqyndaý. Sodan keıin osy máselelerdi retimen sheshý josparyn jasaımyz», - degen mınıstr jaǵdaıy nashar birneshe nysanǵa jeke toqtaldy.

«Búginde Áýezov atyndaǵy Qazaq ulttyq drama teatrynyń ǵımaraty tolyqtaı qalpyna keltirýdi qajet etedi. 40 jylda ǵımaratqa bir de bir ret kúrdeli jóndeý jasalmaǵan. Sondyqtan teatr óziniń ǵasyrlyq toıyn jóndelgen ǵımaratta qarsy alýǵa laıyqty dep oılaımyn.

Sonymen qatar Júrgenov atyndaǵy qazaq ulttyq óner akademııasynyń bas korpýsy da aıtarlyqtaı eskirgen. Arnaýly aýdıtorııalar, tájirıbe sabaqtaryna arnalǵan pavılondar, jataqhanada oryndar jetispeıdi.

Jambyl atyndaǵy qazaq memlekettik fılarmonııasy men Respýblıkalyq akademııalyq nemis drama teatry da jóndeýdi qajet etedi», - dedi Dáýren Abaev.

Sondaı-aq, ol salaǵa jetekshilik etetin orynbasaryna 35 mádenıet nysanynyń qurylysyn jáne 265 nysannyń jóndelýin baqylaýǵa alýdy tapsyrdy.