Dáýren Abaev: Astana Media Week maqsaty - el turǵyndarynyń medıasaýatyn arttyrý
Mınıstr Ortalyq Azııada balamasy joq bul basqosýdyń siz ben bizge, otandyq medıa salasyn damytýǵa qosatyn úlesi joǵary bolatynyna senim bildirdi.
«Memlekettik múddeni halyqqa jetkizip, qoǵamdaǵy ózgeristerge saı kózqaras qalyptastyrýda medıa salasynyń atqarar mańyzy zor. Osy oraıda, elimizdiń aqparattyq quraldary aldynda úlken maqsat-mindetter tur. Ol Elbasy bastaǵan, Memleket basshysy qoldap otyrǵan saıası-ekonomıkalyq jáne Rýhanı jańǵyrý jónindegi keshendi reformalarǵa jurtshylyqty jumyldyrý. Astana Media Week dıalog alańyndaǵy negizgi maqsattardyń biri - sizder bir-birlerińizdi tanyp, pikir almasady degen nıet. Osylaısha, elimizdiń medıa salasyn ár taraptan emes, ortaq múdde aıasynda damytý degen tilek bar. Bul aýqymdy sharanyń kózdegen taǵy bir maqsaty - el turǵyndarynyń medıasaýattylyǵyn arttyrý, medıamádenıetti qalyptastyrý. Aqparat jáne qoǵamdyq damý mınıstrligi mass-medıanyń sapasyn arttyratyn kez kelgen bastamany qoldaýǵa árqashan daıyn. Sizderdi paneldik sessııalarǵa belsene qatysýǵa shaqyryp, búgingi jáne aldaǵy jıyndarǵa tabys tileımin.
Onyń aıtýynsha, medıa salasyndaǵy ózekti máseleler jyldan-jylǵa kóbeıip keledi. Onyń basty sebebi - aqparatty óndirý men tutyný protsesiniń túbegeıli ózgerýi.
«Uıaly telefonnyń teledıdarmen jáne basylymdarmen básekege túskeni barshamyzǵa belgili. Bul protseste tehnologııalyq nemese marketıngtik qana emes, etıkalyq, demografııalyq jáne áleýmettik-saıası erekshelikteri de bar. Moıyndaý kerek, memleket úlken jáne ıkemsiz bıýrokratııalyq mehanızm retinde bul ózgeristerge biz oılaǵandaı jedel jaýap bere almaı otyr. Sondyqtan, biz úshin, memlekettik organdar úshin qazirgi ózgeristerge jaýap berý úshin sizderdiń, kásibı mamandardyń pikiri men kózqarasy óte mańyzdy», - dedi Dáýren Abaev.
Aıta keteıik, elordadaǵy «Qazmedıa» ortalyǵynda úsh kúnge sozylatyn Ortalyq Azııadaǵy eń iri medıa-oqıǵa — Astana Media Week bastaldy.
Astana Media Week-tiń birinshi kúni serıaldyq ónimderdi ázirleý jáne shyǵarý taqyrybymen jáne salyq preferentsııalary, kıno prokatynyń sharttary, mazmuny, fılm óniminiń shyǵarmashylyq deńgeıi jáne onyń demeýshiler úshin tartymdylyǵy taqyrybymen erekshelenedi.