Dáýren Abaev: Astana deklaratsııasy - DDSU jumysyndaǵy jańa kezeń

ASTANA. QazAqparat - Medıtsınalyq-sanıtarlyq alǵashqy kómek boıynsha Astana deklaratsııasy - Dúnıejúzilik densaýlyq saqtaý uıymynyń jumysyndaǵy jańa kezeń bolmaq. Bul týraly «Habar» arnasynda «Ashyq dıalog» baǵdarlamasynda QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat tilshisi.

«Ótken beısenbide Dúnıejúzilik densaýlyq saqtaý uıymynyń Medıtsınalyq-sanıtarlyq alǵashqy kómek boıynsha Astana deklaratsııasyna qol qoıyldy. Bul deklaratsııa qyryq jyl buryn qol qoıylǵan tarıhı qujat - Almaty deklaratsııasyn jańartty. Demek, 40 jyl boıy Dúnıejúzilik densaýlyq saqtaý uıymyna enetin memleketter Almaty deklaratsııasynda jazylǵan qaǵıdattar men mindetterdiń negizi boıynsha jumys júrgizdi. Bul qaǵıdattar men mindetter bálkim mıllıondaǵan adamnyń ómirin saqtap qaldy.

Dáýren Abaev óz sózinde densaýlyq saqtaý salasynda jańa ǵasyrda jańa máseleler men tegeýrinder paıda bolǵandyqtan, Astanada osy qujatqa qol qoıý - osynaý jahandyq uıymnyń jumysynda jańa kezeń bolatynyn atap ótti.

«Bul rette Qazaqstan Respýblıkasy Densaýlyq saqtaý mınıstrliginiń atqarǵan orasan zor eńbegin erekshe atap ótýge bolady», - dedi Dáýren Abaev.

Eske sala ketsek, ótken aptada Dúnıejúzilik densaýlyq saqtaý uıymyna múshe barlyq 197 memleket medıtsınalyq-sanıtarlyq alǵashqy kómek boıynsha Astana deklaratsııasyn bir aýyzdan qabyldaǵan bolatyn.

Óz kezeginde QR Densaýlyq saqtaý mınıstri Eljan Birtanov Medıtsınalyq-sanıtarlyq alǵashqy kómek boıynsha Astana deklaratsııasy qalaı qabyldanǵanyn aıtyp bergen edi.