Dáýren Abaev: Altyn Orda – qazaq tarıhynyń eń negizgi taraýy
Elordadaǵy Ulttyq akademııalyq kitaphanada ótken halyqaralyq sharaǵa AQSh, Ýkraına, Ózbekstan, Qyrǵyzstan, Tatarstan jáne Reseı memleketterinen tarıhshylar men zertteýshiler qatysyp, pikir almasty.
Jıyndy Prezıdent Ákimshiligi basshysynyń birinshi orynbasary Dáýren Abaev quttyqtaý sózimen ashty.
«Eger halyqtyń tutas tarıhyn qalyń kitapqa teńesek, sonyń ishinde óte mańyzdy taraýy bolady. Ol taraý bolmasa kitaptyń mazmuny joǵalýy múmkin.
Ulyq Ulys – tól tarıhymyzdyń osyndaı mańyzdy taraýy. Dalalyq Rımge aınalǵan Uly ımperııa, ártúrli tilde sóılep, árqıly din ustanatyn kóptegen halyqty bir shańyraq astyna biriktirip, ozyq mádenıetti dúnıege ákeldi.
Onyń dáýirlegen tusynda qazaq halqynyń etnogenezdik portreti qalyptasty. Altyn Orda ýaqytynan beri kele jatqan sımvoldardy qazir de kún saıyn kóremiz. Ulttyq valıýtamyz – teńgeniń ataýy sol kezeńge tıesili» - dedi Dáýren Abaev.
Prezıdent Ákimshiliginiń ókili Memleket basshysy rezıdentsııasy Batýdan Abylaı hanǵa deıingi Altyn Orda men Qazaq handyǵy ámirshileriniń ordasy sııaqty atalatynyn eske saldy.
«Parasat pen tózimdilikke qurylyp, Hanafı mazhabyna negizdelgen dástúrli dinimiz Berke men Ózbek handardan muraǵa qalǵan.
Jańa elordamyz – Nur-Sultan qalasy – Uly dalada ásem shaharlar salǵan Ulyq Ulys bıleýshileri ǵurpynyń jalǵasy.
Mysaly Saraıshyq qalasy Joshy ulysynyń, Noǵaı ordasy men Qazaq handyǵynyń rýhanı astanasy boldy. Qazirgi Qyzylorda oblysy aýmaǵynda Jankent, Jent, Barchkent, Túrkistan óńirinde Syǵanaq, Saıram, ıAssy, Sozaq sııaqty qalalar bolǵan» - degen Dáýren Abaev mundaı qalalar elimizdiń soltústiginen de tabyla bastaǵanyna toqtaldy.
«Buǵan dálel – jaqynda ǵana Soltústik Qazaqstan oblysyndaǵy «Qyzyl oba» qorymynan shyqqan qundy jádigerler. Osylaısha biz babalarymyzdyń shetsiz-sheksiz aımaqty meken etken kóshpeliler emes, kerisinshe, óz ýaqytyndaǵy kóshpeli ómir men otyryqshy turmys saltynyń ozyq tustaryn úılestirip, ımperııalyq deńgeıde ústemdik qurǵan halyq bolǵanyn baıqaımyz« - dedi Dáýren Abaev.