Dáýren Abaev aqparattyq ashyqtyqty qamtamasyz etýdiń mańyzdylyǵyn atady

NUR-SULTAN. QazAqparat – Aqparat jáne qoǵamdyq damý mınıstri Dáýren Abaevtyń tóraǵalyǵymen aqparatqa qol jetkizý máseleleri jónindegi komıssııanyń kezekti otyrysy ótti. Bul týraly QazAqparat mınıstrliktiń baspasóz qyzmetine silteme jasap habarlaıdy.

Komıssııa otyrysyna Parlament Májilisiniń depýtattary, ortalyq memlekettik jáne jergilikti atqarýshy organdardyń, IT-kompanııalardyń, ÚEU jáne Aqparatqa qol jetkizý salasyndaǵy sarapshylar qaýymdastyǵynyń ókilderi qatysty.

Otyrysty asha otyryp, mınıstr Dáýren Abaev aqparattyq ashyqtyqty qamtamasyz etýdiń mańyzdylyǵyn jáne «Aqparatqa qol jetkizý týraly»zań talaptaryn oryndaýdyń mindettiligin atap ótti.

Otyrysta 2018 jylǵy memlekettik organdar qyzmetiniń ashyqtyǵy dárejesin baǵalaý nátıjeleri usynyldy. 2017 jylmen salystyrǵanda kórsetkishterdiń aıtarlyqtaı nasharlaýy baıqalady. Bul baǵalaý ádistemesiniń ózgerýimen de, óziniń ashyqtyǵyn qamtamasyz etý jónindegi memlekettik organdardyń jetkiliksiz jumysymen de baılanysty.

Komıssııa sondaı-aq birqatar memlekettik organdardyń (OSK, Respýblıkalyq bıýdjettiń atqarylýyn baqylaý jónindegi esep komıteti, Indýstrııa jáne ınfraqurylymdyq damý mınıstrligi) aqparattyq júıeleriniń derekterin «Zerde» Holdıngi júrgizgen taldaýdyń qorytyndylaryn qarady. Onyń qorytyndysy boıynsha «Ashyq derekter» portalynda 30-ǵa jýyq jańa derekter jınaǵy jarııalanyp, jalpyǵa qoljetimdi bolady.

Sondaı-aq, «Zerde» Holdıngi Basqarma tóraǵasynyń orynbasary A. Anısımov óz sózinde Ashyq derekter negizinde 5 jańa qosymshalar ázirlenip jatqandyǵy týraly atap ótti. Olar «Smart Aqsý», «Smart Qostanay», «Smart Zapravka», «UniPark Klıent» jáne «DocuLite» qosymshalary.

Otyrysqa shyǵarylǵan taǵy bir másele – ashyq otyrystardyń onlaın-translıatsııasyn ótkizý boıynsha «aqparatqa qol jetkizý týraly» Zańnyń talaptaryn oryndaý. Qazirgi tańda memlekettik organdardyń túgeliniń derlik bul talapty saqtamaıdy. Sondyqtan tıisti usynymdar berildi.

Otyrys sońynda ázirlenip jatqan memlekettik organdardyń ınternet-resýrstarynyń biryńǵaı platformasynyń beta-nusqasy (IRBP) tanystyryldy, ol barlyq memlekettik organdardyń resmı ınternet-resýrstaryn jáne «elektrondyq úkimet»portalyn biriktiredi.

«Ulttyq aqparattyq tehnologııalar» AQ Basqarma tóraǵasy A. Turysovtyń aıtýynsha, jyl sońyna deıin barlyq memlekettik organdardyń ınternet-resýrstaryn IRBP-ǵa kóshirý, al 2020 jyldyń 1 qańtarynan bastap ony iske qosý josparlanyp otyr.