Dáýren Abaev ádebıet salasyndaǵy jańa jobalar týraly aıtty

NUR-SULTAN. QazAqparat - 2023 jyldan bastap qazaqstandyq jas jazýshylar men aqyndar úshin arnaıy Prezıdenttik ádebı syılyq taǵaıyndalady. Bul týraly Pavlodar oblysynda halyqpen kezdesý barysynda Mádenıet jáne sport mınıstri Dáýren Abaev aıtty, dep habarlaıdy QazAqparat.

Endi 18 jastan 29 jasqa deıingi avtorlar joǵary marapatqa ıe bola alady.

Sondaı-aq mınıstr jas ádebıetshilerdi qoldaý boıynsha júzege asyrylyp jatqan basqa da jobalar týraly aıtyp berdi.

«Biz «Jańa qazaq ádebıeti« atty jańa jobany qolǵa aldyq. Onyń aıasynda daryndy jas avtorlardyń kitaptary 3 myń dana taralymmen basyp shyǵarylady. Bul jumys jas urpaqtyń jańasha oılaý júıesin damytýǵa kómektesedi, olardyń shyǵarmashylyq kóńil-kúıi men ınnovatsııalyq ıdeıalaryn qoldaıdy. Sonymen qatar qazir jalpy júlde qory 35 mln teńgeni quraıtyn «Aıboz« tuńǵysh ulttyq ádebı syılyǵyna ótinimder qabyldaý júrip jatyr. Osylaısha biz ádebıetimizge jańa týyndylardyń qosylýyna yqpal etip, qalamagerler men baspagerlerdi qoldaýdyń jańa tetikterin qalyptastyramyz», - dedi Dáýren Abaev.

Foto: QR Mádenıet jáne sport mınıstrligi