Dáýren Abaev «100 jańa esim» jobasy ne úshin kerektigin túsindirdi

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev «Qazaqstannyń 100 jańa esimi» jobasy ne úshin kerektigin aıtty, dep habarlaıdy QazAqparat tilshisi.

Vedomstvo basshysy «100 jańa esim» jobasy Táýelsizdik jyldarynda elimizge oń yqpalyn tıgizgen azamattardy nasıhattaý, olardyń eńbek tájirıbesin tanystyrý maqsatynda uıymdastyrylǵanyn eske saldy.

«Osy joba arqyly túrli salada Qazaqstanda daryndy jastar bar ekenin kórsetkimiz keledi. Búginde olardyń tabysty tájirıbesi kóptep kezdesedi. Ókinishke qaraı, kúndelikti ómirdegi qarbalas jumystarmen osy adamdardy baıqamaı júrýimiz múmkin. Sondyqtan bul adamdardyń tabysty eńbek tájirıbesimen maqtan tutatynymyzdy kórsetkenimiz jón», - dedi D. Abaev elordada ótken baspasóz máslıhatynda.

Osy oraıda mınıstr «100 jańa esimge» laıyqty adamdar jaıynda kóbirek aıtý artyq bolmaıtynyn, osy adamdar qıyndyqty qalaı eńsergeni barshaǵa úlgi ekenin jetkizdi.

«Osy adamdardyń ómir joly óskeleń úrpaqty yntalandyrýy kerek, ıaǵnı úlgi bolýy tıis. Bul turǵyda kópbalaly otbasylardan shyqqan balalar úshin úlgi bolatyny anyq. Óıtkeni atalǵan jobaǵa qatysýshylardyń kóbisi kópbalaly otbasylardyń tárbıesinde boldy. Olar búginde túrli salada eleýli tabysqa jetip otyr», - dedi D. Abaev.

Budan burn habarlanǵandaı, 2019 jyldyń 1 qazanynan bastap 100janaesim.ruh.kz saıtynda «Qazaqstannyń 2019 jylǵy 100 jańa esimi: jas qazaqstandyqtardyń tabys tarıhy» jobasyna ótinimder qabyldaý bastalady.