Dáýlet Turlyhanovtyń uly áskerı bólimnen qashyp ketken

ASTANA. QazAqparat – Qoǵam qaıratkeri, tanymal sportshy Dáýlet Turlyhanovtyń áskerdegi uly boryshyn óteý ornynan qashyp ketken, dep habarlaıdy QazAqparat tilshisi Qorǵanys mınıstrliginiń baspasóz qyzmetine silteme jasap.

«2023 jylǵy 2 shildede Qonaev garnızonynyń áskerı bólimderiniń birinde merzimdi qyzmetin ótkerip jatqan qatardaǵy jaýynger B. qamaýǵa alý merzimi aıaqtalǵannan keıin (buıryqqa baǵynbaý nemese ony ózgedeı oryndamaǵany úshin gaýptvahtada ustaý túrinde ákimshilik jaýapkershilikke tartyldy) áskerı qyzmetshiniń súıemeldeýimen áskerı bólimniń ornalasqan jerine qaıtyp bara jatqan kezinde belgisiz baǵytta qashyp ketken», - delingen habarlamada.

Aqparatty aıtylǵandaı, áskerı qyzmetshiniń ornalasqan jerin anyqtaý boıynsha izdestirý is-sharalary uıymdastyryldy. Atalǵan fakti boıynsha qyzmettik tekseris taǵaıyndaldy.

Eske sala keteıik, bıyl aqpanda Almatyda zańger Anna Dmıtrıevıch pen onyń kúıeýi Oleg Chernov soqqyǵa jyǵylǵan edi.

Almaty qalalyq Polıtsııa departamenti atalǵan derek QR QK-niń 293-baby («Buzaqylyq») boıynsha sotqa deıingi tergeýdiń biryńǵaı tizilimine tirkelgenin habarlady.

Keıin sport qaıratkeri Dáýlet Turlyhanov balasynyń buzaqylyq áreketine baılanysty pikir bildirdi.

Odan bólek, Dáýlet Turlyhanov ulynyń isine aralasyp jatpaǵandyǵyn aıtty.

Sondaı-aq, Qorǵanys mınıstrligi Dáýlet Turlyhanovtyń uly áskerı mindetin óteýdi jalǵastyrýyna qatysty pikir bildirgen edi.