Dáýlet Turlyhanov Qasym-Jomart Toqaevtyń kandıdatýrasyn qoldaýǵa shaqyrdy

ASTANA. QazAqparat – Qazaqstannyń eńbek sińirgen qaıratkeri, Olımpıada oıyndarynyń kúmis, qola júldegeri Dáýlet Turlyhanov AMANAT partııasyndaǵy jaqtastarynan Qasym-Jomart Toqaevty prezıdenttikke kandıdat retinde qoldaýǵa shaqyrdy, dep habarlaıdy QazAqparat tilshisi.

«Ádiletti qoǵam qurý, «Halyq únine qulaq asatyn memleket» qalyptastyrý jolynda elimizde qyzý jumystar atqarylýda. Talaı jyl jaýyr bolǵan kóp másele retke kele bastady. Prezıdentimizdiń bastamasymen el múddesine saı júıeli reformalar qolǵa alyndy. Sport salasynyń damýyna erekshe kóńil bólinip, jaqsy qoldaý kórsetilip jatyr», - dedi ol elordada ótip jatqan AMANAT partııasynyń kezekten tys XXIV sezinde.

Dańqty palýan elimizdiń barlyq óńirinde ámbebap sport keshenderi salynǵanyn, aýlalar men qoǵamdyq oryndarda jattyǵý jabdyqtary men qurylǵylar qoıylǵanyn atap ótti.

«Osy múmkindikterdi oryndy paıdalanyp, urpaǵymyzdy deni saý, myqty qylyp ósirýimiz kerek. Bárimizge ortaq jalǵyz ǵana Otanymyz, memleketimiz bar. Bizdi ortaq maqsattar men qundylyqtar biriktiredi. Elimizdi qıyn kezeńde tastamaı, biriktirip alyp shyqqan qajyrly eńbegin baǵalap, bolashaqqa baǵyttalǵan tyń bastamalary men halyqtyń múddesine arnalǵan josparyna senim artyp, Qasym-Jomart Kemeluly Toqaevty bir kisideı qoldaýǵa barshańyzdy shaqyramyn!», - dedi Dáýlet Turlyhanov.

Foto: olympic.kz