Dáýlet Turlyhanovtyń uly bas bostandyǵynan aıyryldy
Buǵan deıin Joǵarǵy Sot N.Bolatqa eki nemese odan da kóp adamnyń densaýlyǵyna qasaqana aýyrlyǵy ortasha zııan keltirgeni úshin (QR QK-niń107-baby 2-bóligi 1-tarmaqshasy boıynsha) 2 jylǵa bas bostandyǵyn shekteý jazasyn taǵaıyndaǵan bolatyn.
Bolat probatsııa qyzmetiniń esebine alynyp, jazany óteýdiń tártibi men sharttarymen jáne ony buzǵany úshin jaýapkershilikpen tanysqan.
«Sottalǵannyń ornalasqan jerin baqylaýdy qamtamasyz etý úshin elektrondy baqylaý quraly qoldanyldy. Osyǵan qaramastan, Bolat probatsııalyq baqylaýdyń 3 ret zań buzýshylyqtaryna jol bergen, ol sotpen zerttelgen dáleldemelermen rastalǵan. Osylaısha, sottalýshy jazasyn óteý tártibimen sharttaryn qasaqana buzǵan», - delingen sot habarlamasynda.
Qylmystyq kodekstiń 44-babynyń 3-bóligine sáıkes, bas bostandyǵyn shekteýdi óteýden qasaqana jaltarǵan jaǵdaıda onyń ótelmegen merzimi bas bostandyǵyn shekteýdiń bir kúnine bas bostandyǵynan aıyrýdyń bir táýlik mólsherinde bas bostandyǵynan aıyrýmen aýystyrylady.
Sot probatsııa qyzmetiniń ótinishhatyn negiz dep tanyp, ony qanaǵattandyrdy.
N.Bolatqa bas bostandyǵyn shekteý túrindegi jazasy ótelmegen merzimge 1 jyl 5 aı 10 kúnge bas bostandyǵynan aıyrýmen aýystyryldy.
Qaýly zańdy kúshine engen joq.
Osyǵan deıin áleýmettik jelide Májilis depýtaty Dáýlet Turlyhanovtyń bostandyǵy shektelgen uly Nurasyl Bolattyń túngi ýaqytta emin-erkin júrgen vıdeosy taraǵany týraly jazǵan edik.
Eske sala keteıik, 2023 jyly aqpanda Nurasyl Bolat Almatyda zańger Anna Dmıtrıevıch pen onyń kúıeýi Oleg Chernovty soqqyǵa jyqqan edi.
Keıin sport qaıratkeri Dáýlet Turlyhanov balasynyń buzaqylyq áreketine baılanysty pikir bildirdi.
Odan bólek, Dáýlet Turlyhanov ulynyń isine aralaspaıtynyn aıtty.
Al, ótken jyly 2 shilde kúni ol merzimdi áskerı boryshyn ótep jatqan jeri – Qonaev garnızony áskerı bólimderiniń birinen qashyp ketken bolatyn.
Keıin kóp ótpeı tabylyp, qyzmet atqaratyn ornyna jetkizildi.
Almaty garnızony bólim bastyǵynyń buıryǵyna baǵynbaǵany jáne oryndamaǵany úshin ákimshilik jaýapkershilikke tartyldy.
2023 jyly 9 qazanda Dáýlet Turlyhanovtyń ulyna sot úkimi shyqty.
Prokýror sottalýshy B-ǵa 1 jyl 6 aı bas bostandyǵyn shekteý túrinde jaza taǵaıyndaýdy surady.
Bıyl mamyrda Joǵarǵy sot Dáýlet Turlyhanovtyń ulyna kesilgen úkimdi ózgertti. Sodan soń Dáýlet Turlyhanov ulynyń sot úkimine qatysty pikir bildirdi.
QR Parlamenti Májilisiniń depýtaty Dáýlet Turlyhanovtyń uly Nurasyl Bolat probatsııalyq baqylaýdy elemegeni úshin bas bostandyǵynan aıyrylýy múmkin ekenin jazǵan bolatynbyz.