Daýyldy kúnderi jáne aptap ystyqtarda Ertis ormanyna kirýge bolmaıdy

<p>PAVLODAR. KAZINFORM - Kúnniń ysı túskenine baılanysty &laquo;Ertis ormany&raquo; memlekettik rezervatynda órt qaýiptiliginiń IV klasy belgilenip, orman qorynyń aýmaǵyna adamdardyń kirýine shekteý qoıyldy. Mekeme basshylyǵy mundaı shekteýler aptap ystyqtarda jáne daýyldy kúnderi bolatynyn eskertip otyr.</p>

Bul týraly «Ertis ormany» rezervatynyń baspasóz qyzmetinen habarlandy.

«Joǵary órt qaýiptiliginiń IV klasyna baılanysty «Ertis ormany» tabıǵı rezervatynyń aýmaǵyna kirýge shekteý qoıylady. Azamattarǵa jaıaý jáne kólikpen kirýge bolmaıdy. Qaraǵaı ormandaryn órtten saqtaý – ár azamattyń paryzy. Sondyqtan óńir jurtshylyǵyn tabıǵatqa uqypty qaraýǵa jáne órt qaýipsizdigin barynsha saqtaýǵa shaqyramyz», dep málimdedi mekemeden.
Órt qaýipsizdigi erejelerin buzǵan kináli tulǵalar qoldanystaǵy zańnamaǵa sáıkes, ákimshilik jáne qylmystyq jaýapkershilikke tartylady.

Foto: Ertis ormany rezervaty

Orman ınspektorlary órtke kýá bolǵan azamattar oqıǵa týraly 8 (71836) 32-2-22, 8 [phone] nemese 101 telefon nómirlerine habarlaýdy eskertedi.

Atap óterligi, rezervat aýmaǵynda haziret Ǵabdul-Ýahıt Tilenshiulynyń kesenesi ornalasqan. Mamandar órt qaýpi kúsheıgen ýaqytta oǵan arnaıy ruqsat qajet bolatynyn aıtady.

- Joǵary órt qaýiptiliginiń IV klasy týyndaǵan ýaqytta kesenege barýshylar áýeli Sadyqaşy ormanshylyǵyna baryp, arnaıy joldama alýy kerek. Ol keseneden shamamen 5-6 shaqyrym jerde ornalasqan. Biz osylaısha rezervat aýmaǵyna kelýshilerdi baqylaı alamyz. Al keleshekte úlken joldan Ǵabdul-Ýahıt Tilenshiulynyń kesenesine burylatyn jerge ótkizý beketin ornatý josparda tur, - deıdi «Ertis ormany» memlekettik rezervatynyń tabıǵı keshen jáne nysana qorǵaý bóliminiń basshysy Qobylandy Atyǵaev.

Eske sala keteıik, bıyl «Ertis ormany» rezervatynyń órtke qarsy daıyndyǵy máz bolmaı tur.

Tek ol emes, oblystaǵy ózge de orman qorǵaý mekemelerinde shıkilikter kezdesip jatyr.

«Ertis ormany» rezervatynda bıyl qaraǵaıdyń 14 mln kósheti otyrǵyzylady.