Dástúrli Jáýtikov olımpıadasyna 25 eldiń oqýshylary qatysady

ASTANA. QazAqparat – 1 aqpan kúni Almatyda HІH Halyqaralyq Jáýtikov olımpıadasy bastalady. Oǵan álemniń 25 elinen 1200-den astam oqýshy qatysady. QazAqparat bul týraly Oqý-aǵartý mınıstrligine silteme jasap habarlaıdy.

Alys jáne jaqyn shet memleketterden kelgen 281 komanda úsh pán – matematıka, fızıka jáne ınformatıka boıynsha bilimderin synaıdy. Zııatkerlik saıysta elimizdiń namysyn 250-ge jýyq oqýshydan jasaqtalǵan 35 komanda qorǵaıtyn bolady.

Aıta keteıik, Halyqaralyq Jáýtikov olımpıadasyna fızıka-matematıka baǵytyndaǵy mamandandyrylǵan mektepterdiń oqýshylary qatysady. Olımpıada qorytyndysy boıynsha jeke reıtıng, sondaı-aq mamandandyrylǵan mektepterdiń myqty komandalarynyń reıtıngi jasalatyn bolady.

«Halyqaralyq qazylar alqasynyń quramyna TMD-nyń eń myqty tehnıkalyq ýnıversıtetteriniń ókilderi kiredi. Jeńimpazdar altyn, kúmis jáne qola medaldarmen marapattalady.

Olımpıada 1-10 aqpan aralyǵynda Almatydaǵy Respýblıkalyq fızıka-matematıka mektebiniń bazasynda ótedi. Saıys qorytyndysy 10 aqpanǵa josparlanǵan», - delingen Oqý-aǵartý mınıstrliginiń baspasóz qyzmeti taratqan habarlamada.