Dástúrli BAQ-tyń bolashaǵy zor – Nurjan Muhamedjanova
«Almaty» telarnasynda jumys tańǵy jınalystan bastalady. Onda aptaǵa arnalǵan josparlar talqylanyp, kúndelikti jáne qorytyndy jańalyqtarda shyǵatyn sıýjetter pysyqtalady.
«Almaty» telearnasy – «Almaty» teleradıokompanııasy» AQ efırlik brendi. 1999 jyly qalalyq televızııa bazasynda qurylǵan. 2010 jyly aımaqtyq arnadan respýblıkalyq telearnaǵa túrlenip, 2016 jyldyń aqpan aıynda óńirlerdi tutas qamtıtyn ulttyq tsıfrlyq habar taratýshylardyń tizimine endi. Qazir «Otaý TV» respýblıkalyq spýtnıktik televızııasy arqyly Qazaqstannyń kez kelgen aımaǵyndaǵy kórermen tamashalaı alady. Odan bólek, barlyq kabeldik operatorlar jelisi arqyly habar taratady.
«Almaty telearnasynyń qurylǵanyna jıyrma jyldan asty. Qazir jıyrma birinshi teledıdarlyq maýsymǵa aıaq bastyq. Pandemııa kezinde bizdiń telearna almatylyqtar úshin de, qazaqstandyqtar úshin de koronavırýsqa qatysty negizgi aqparat taratýshy kózderiniń birine aınaldy. Bizdi alyp megapolıs turǵyndary ǵana emes, elimizdiń baryq óńiri kóredi. Arnamyz qalanyń tynys tirshiligin esh boıamasyz kórsetýge tyrysady. Sonymen qatar, biz úshin aqparattyń senimdiligi, jedeldigi jáne tolyqtyǵy basty negizgi qaǵıdat.
Sońǵy ýaqytta dástúrli televızııa básekege qabiletti bola ala ma degen pikirler kóp aıtylyp júr. Meniń oıymsha, dástúrli BAQ-tyń ómiri uzaq, bolashaǵy zor. Bul, kez kelgen azamattyń naqty jáne shynaıy aqparat izdeıtindigimen baılanysty. Men jáne meniń áriptesterim úshin aýdıtorııa aldyndaǵy jaýapkershilik árqashan da joǵary bolmaq. Bizdiń basty maqsatymyz - kórermenge shynaıy aqparat jetkizý.
Pandemııanyń qıyndyqtaryna qaramastan, biz alǵa qaraı jyljýdy jalǵastyramyz jáne kórermender qalaýyn eskerip túrli baǵdarlamalar ázirleımiz. Atap aıtar bolsam, aqparattyq- saraptama baǵdarlamasy, oıyn-saýyq, áleýmettik sala jáne taǵy basqa. Qolda bar derekterge súıensek, Almatyda 400 myńǵa jýyq bala turady. Sondyqtan biz talantty balalardy qoldaý maqsatynda «Almaty BalaFest» festıvalin bastadyq.
Sondaı-aq, stýdentterdiń ǵylym, mádenıet, áleýmettik saladaǵy ozyq bilimderin kórsetetin «IQ Almaty» ıntellektýaldy shoýyn atap ótkim keledi. Men jobanyń jas qatysýshylary qanshalyqty ıntellektýaldy túrde damyǵanyn kórip, táýelsiz Qazaqstannyń bolashaǵy jaqsy qolda ekenine senimdi boldym», - deıdi «Almaty TV» telearnasynyń Bas dırektory Nurjan Muhamedjanova.
Jaqynda telearnada jańa joba - «Almaty keshi» kórermenderge jol tartty. Tok-shoýǵa elimizge tanymal ártister, mýzykanttar, jazýshylar, óner qaıratkerleri, sportshylar qonaq bolyp qatysyp, kórermenniń kóńil saraıyn ashady. Onyń júrgizýshisi – Táýekel Músilim.
«Chestno s Sergeem Ponomarevym», «Shynaıy Aqberenmen», «Almaty tarıhy» jobasynyń da turaqty kórermenderi bar. Atalǵan baǵdarlamalar arnadaǵy reıtıngisi joǵary jobalardyń qataryna enedi.
«Baqytty otbasy» áleýmettik jobasyn atap ótpeske bolmaıdy, baǵdarlama apta saıyn efırge shyǵady. Onda kópbalaly analardyń ómiri men kúndelikti turmysta kezdesetin qıyndyqtardy qalaı jeńgeni, shaǵyn jáne orta bızneste jetken jetistikteri baıandalady. Aıta ketý kerek, bizdiń keıipkerlerimiz alǵa qoıǵan maqsattaryna Almaty qalasy ákimdiginiń qoldaýynyń arqasynda jetti.
Telearnanyń shymyldyǵyn tikeleı efırde «Tańǵy stýdıo» baǵdarlamasy ashady. Bul habar kórermenge kúni boıyna jetetin kóterińki kóńil kúı syılaıdy. Efır barysynda Qazaqstannyń ár aımaǵyndaǵy kórermenimiz qońyraý shalyp, stýdııa qonaqtarymen tikeleı baılanys ornatady, vıktorınalar men telearnanyń arnaıy aktsııalaryna qatysady. Biz turaqty kórermenderimizdiń súıispenshiligi men qoldaýyna árqashan rızashylyqpen qaraımyz.
Sonymen qatar, mádenı- tárbıelik jáne tarıhı qundylyqqa baı birqatar derekti fılmder men serıaldarymyz bar. Máselen, memlekettik aqparattyq tapsyrys sheńberinde bıyl Turar Rysqulovtyń qoǵamdyq-saıası ómirine arnalǵan serıal túsirýdi josparlap otyrmyz. Búginde jobanyń stsenarııi jazylýda. Al, akterlerge kastıng ótip jatyr.
2021 jyl el úshin óte mańyzdy oqıǵalarǵa toly bolmaq. Osy turǵyda QR Táýelsizdiginiń 30 jyldyǵyn toılap jatyrmyz. Osyǵan oraı, telearna «Táýelsizdik – tuǵyrym meniń», «Almaty – Táýelsizdik besigi» atty derekti fılmderiniń kınohronıkalyq tsıklyn daıyndap jatyr. Onda belgili tulǵalar elimizdiń táýelsizdik tarıhy týraly oılaryn ortaǵa salady. Bir sózben aıtqanda, bizdiń kásibı komanda ár jobaǵa jaýapkershilikpen qaraıdy.
Biz qolda bar zamanaýı tehnıkalyq qural-jabdyqtar men shyǵarmashylyq toptyń sarqylmas qýatyn qoldana otyryp, talǵampaz aýdıtorııanyń kózi qaraqty kórermenderiniń qyzyǵýshylyqtaryn árqashan eskeremiz. «Almaty» telearnasy - mobıldi, tehnologııalyq jáne ınnovatsııalyq telekompanııa ataný úshin aıanbaı eńbek etip jatyr. Tól ónimderdiń sapaly bolýyna jiti mán beriledi. Sondyqtan, kórermen nazaryna tek mańyzdy jańalyqtardy, jan-jaqty zerttelgen saraptamalyq jobalardy, el qyzyǵa qaraıtyn mádenı-tanymdyq jáne oıyn-saýyq baǵdarlamalardy usynyp kelemiz», - dedi telearnanyń Bas dırektory.
Kıno súıer qaýym telearna efırinen shym-shytyryqqa toly melodramalyq jáne komedııalyq serıaldardy tamashalaıdy. Olar otandyq, reseılik, túrik jáne qytaılyq teleónimder. Al, demalys kúnderi keńestik, qazaqstandyq, sheteldik-zamanaýı fılmderdiń altyn qorynan alynǵan kınolardy kóre alady. Odan bólek, mereke kúnderi oıyn-saýyqtyq sharalar men kontserttik jobalar telearna efırinen beriledi.
«Memlekettik saıasatty qoldaýshy retinde biz kórermenderdiń nazaryna Almaty qalasy ákimdiginiń ekonomıka, áleýmettik órkendeý, óndiris, ınfraqurylym salalaryndaǵy ilkimdi jumystary men tıimdi reformalary týraly jańalyqtardy usynamyz. Telearnanyń júregi – jańalyqtar degen uǵym bar. Rasynda solaı. Bizde birneshe redaktsııalyq bólim bar. Qazir koronavırýsqa qarsy vaktsına, QR Táýelsizdiginiń 30 jyldyǵyna arnalǵan aıdarlar bar. Ózderińiz biletindeı, biz tikeleı efır formatyn óte tıimdi qoldanamyz. Máselen, aptanyń ár sársenbisinde «Akimat Live» baǵdarlamasy qala ákiminiń qatysýymen tikeleı efırde kórsetiledi. Joba barysynda kez kelgen qala turǵyny óziniń suraǵyn qala ákimi Baqytjan Saǵyntaevqa tikeleı efırde joldap, sol sátte naqty jaýap ala alady.
Qyraǵy jýrnalısterdiń arqasynda biz adam quqyqtarynyń buzylýy men túrli ádiletsizdik, áleýmettik-qoǵamdyq máselelerdi sheshýge uıytqy bolyp júrmiz. Bolashaqta biz kórermenderimizge jaǵymdy áserler syılaıtyn baǵdarlamalardyń sanyn kóbeıtkimiz keledi», - deıdi Bas dırektordyń kontentti basqarý jónindegi orynbasary Qurmanáli Qalmahan.
Tilshi de tilekshi Ramına Mırzalımova «Almaty» telearnasyna jumysqa 2019 jyly keldi.
«Men Taraz qalasynyń týmasymyn. Almatyǵa kásibı ósý úshin keldim. Telearnaǵa jýrnalıst kerek ekenin estip, ózimdi synap kórýge sheshim qabyldadym jáne taǵylymdamadan óttim. Biraz sıýjetter daıyndap ózimdi kórsettim. Keıin meni jańalyqtar bólimine jumysqa qabyldady. Biz kún saıyn qalanyń ózekti taqyryptaryn kóteremiz. Meniń daıyndaǵan sıýjetterimniń arqasynda turǵyndardyń máseleleriniń oń sheshilgen kezderi jıi kezdesedi. Maǵan mamandyǵym, jumysym qatty unaıdy. Men úshin qoǵamǵa paıdaly ekenimdi seziný mańyzdy», - deıdi Ramına.
«Almaty TV» Bas dırektorynyń strategııalyq damý jáne marketıng jónindegi orynbasary Ralıda Muqanovanyń aıtýynsha, sońǵy jyldary arna baǵdarlamalarynyń sapasy artty.
«Bizde tanymdyq, avtorlyq baǵdarlamalar men teleserıaldar bar. Jazýshylar odaǵynyń 85 jyldyǵyna oraı shaǵyn derekti fılmder toptamasyn túsirdik. Jınaq - kitap shyǵardyq. Pandemııa kezinde bizdiń jýrnalıster ózderiniń tózimdiligi men kásibı sheberlikterin dáleldedi. Olar qaýipti aımaqtarda jumys istedi. Árıne, qıyn boldy. Biraq biz tótenshe jaǵdaıda qalaı jumys isteý kerektigin úırendik. Biz- tilshileri toqtaýsyz jumys istegen jalǵyz – arna boldyq. Keıbir bólimder qashyqtyqtan jumys istegen kezde jańalyqtar qyzmeti árqashan aldyńǵy qatarda boldy. Aqparat naqty ári shynaıy berilip otyrdy. Ár turǵynǵa obektıvti aqparat qajet boldy. Bizdiń saıtqa kúnine úsh júz myń adam kirgen kezder de boldy», - dedi ol.
Endi «Almaty TV» telearnasynyń jýrnalısteri qalanyń kez kelgen núktesinen tikeleı efırge shyǵa alady. Bul eń damyǵan portatıvti onlaın habar taratý júıesiniń arqasynda múmkin boldy. Reporter qaı jerde bolmasyn, júıe Full HD rejıminde joǵary sapaly sıgnal jiberedi.
Qoıýshy – operator Eldar Muqashev arnada on jylǵa jýyq ýaqyt jumys isteıdi.
«Men negizinen tikeleı efırde jumys isteımin. Tikeleı efır - úlken jaýapkershilik. Biraq men óz jumysymnan ǵana rahat alamyn», - dep bólisti ol óz oıymen.
Telearnanyń ardager operatorlarynyń biri – Murat Taıjanov. Ol jalpy tájirıbesi 100 jyl bolatyn televızııalyq áýletten shyqqan kánigi maman.
«Men eńbek jolymdy 1996 jyly Pavlodar qalasyndaǵy oblystyq telearnadan bastadym. Meniń naǵashylarymnyń bári telearnada jumys isteıdi. Anamnyń baýyrlary men ápkeleri - rejısser. Men Almatyǵa keldim, óıtkeni úlken qalada kóptegen múmkindik bar dep senemin. Búgin men «Almaty TV» arnasynda operator bolyp jumys isteımin. Bizdiń jumysymyz óte qyzyqty. Jaqynda jańa kameralar keldi. Jańa tehnologııalardyń arqasynda jumysymyz jeńildenip, yńǵaıly bola bastaǵanyn baıqap júrmin. Biraq, qandaı kamera bolmasyn, operatordyń ózindik kózqarasy bolýy kerek. Mamandyǵymdy jaqsy kóremin. Mamandyq tańdaýda qatelespedim dep oılaımyn. Teledıdar táýeldilikti týdyrady. Munda kelgenderdiń ketkisi kelmeı qalady», - dedi ol.
2018 jyly «Almaty TV» telearnasy televızııa jýrnalıstıkasyn damytýǵa qosqan úlesi úshin elimizdiń Tuńǵysh Prezıdenti N.Á.Nazarbaevtyń atynan Alǵys hatpen marapattaldy.
2020 jyly «Úzdik aımaqtyq arna» nomınatsııasy boıynsha «Tumar» ulttyq televızııalyq syılyǵyn jeńip aldy.
Táýlik boıy ortasha habar taratý ýaqyty – 24 saǵat. Efırden beriletin baǵdarlamalardyń 55% memlekettik tilde kórsetiledi. Telearnanyń «Nur-Sultan» qalasynda qosyny bar.
«Osy múmkindikti paıdalana otyryp, áńgimemizdiń sońynda men barlyq áriptesterimdi kásibı merekelerimen quttyqtaǵym keledi», - dep sózin aıaqtady Nurjan Muhamedjanova.