Dástúrli ánshiler baıqaýynyń jeńimpazy anyqtaldy
Baıqaý kerbez Kókshe topyraǵynda dúnıege kelip, óner órisiniń qazaq dalasynda órken jaıýyna ólsheýsiz úles qosqan tuǵyry bıik, rýhy órshil Arqa óńiriniń aqıyq dúldúlderi – Aqan seri Qoramsauly men Imanjúsip Qutpanulynyń shyǵarmalaryn halyqqa keńinen nasıhattaý maqsatynda uıymdastyryldy. Oǵan elimizdiń ár óńirinen 12 ánshi qatysyp, baq synady.
Baıqaýǵa Birjan sal atyndaǵy mýzyka kolledjiniń dırektory, «Mádenıet salasynyń úzdigi» Saıan Muhamedııar (qazylar alqasynyń tóraǵasy), QR eńbek sińirgen ártisi, dástúrli ánshi Bısara Makenqyzy, QR eńbek sińirgen qaıratkeri, Eren eńbegi úshin tós belgisiniń ıegeri, Óner ýnıversıtetiniń dotsenti, dástúrli ánshi Tolǵanbaı Sembaev, Málik Ǵabdýllın mýzeıiniń dırektory, «Mádenıet salasynyń úzdigi», dástúrli ánshi Kenjebaı Muqyshev, Aqmola oblystyq halyq shyǵarmashylyǵy jáne mádenı demalys ortalyǵy dırektorynyń mindetin atqarýshy Ashat Maǵaýın qazylyq etti.
Ónerli dodanyń qorytyndysy boıynsha ІІI dárejeli dıplommen jáne 300 myń teńge aqshalaı sertıfıkatpen aqmolalyq ánshi Dıana Altaıqyzy, qyzylordalyq Nurtilek Aqtaev marapattaldy. ІІ ory men 500 myń teńge aqshalaı sertıfıkat kókshetaýlyq Tólegen Amanovqa buıyrdy. Al Almaty oblysynyń ókili Іdirbaı Baıbaqty І dárejeli dıplomǵa jáne 800 myń teńge aqshalaı sertıfıkatqa ıe boldy.
«Arqanyń án darııasy» respýblıkalyq dástúrli ánshiler baıqaýynda úzdik óner kórsetip, oryndaýshylyq sheberligin tanytqany úshin bas júlde – 1 mln teńgeniń aqshalaı sertıfıkatyna jáne uıymdastyrý alqasynyń dıplomyna Abaı oblysynan kelgen ánshi Tańat Muqyshev laıyq dep tanyldy.
Sonymen birge birqatar ánshi uıymdastyrý alqasynyń dıplomymen jáne 100 myń teńge aqshalaı syılyqpen marapattaldy.