Dástúrimizdi bilý jetkiliksiz, ony qorǵaýymyz kerek – saıasattanýshy

NUR-SULTAN. QazAqparat – «Rýhanı jańǵyrý» baǵdarlamasy kóptegen ózekti máseleni kóterdi. Dástúrimizdi bilý jetkiliksiz, ony qorǵaýymyz kerek. Bul týraly «Rýhanı damý jáne ulttyq dástúrlerdi saqtaý» taqyrybynda ótken dóńgelek ústelde QR Parlamenti májilisiniń depýtaty, saıasattanýshy Berik Ábdiǵalıuly aıtty, dep habarlaıdy QazAqparat tilshisi.

«Rýhanı jańǵyrý» baǵdarlamasynyń basty maqsaty – ulttyq quldyraýdan aman alyp qalý. Búgingi kúni jastarmen sanasýymyz kerek. Jastardyń sanasy ózgerek. Olardyń sanasyna rýhanı qundylyqtardy qalaı engizýge bolady? Bul óte úlken jumys.

Alashordashylar kezinde Japonııany bekerden beker mysalǵa keltirmegen. Japonııanyń negizgi qaǵıdasy – ulttyq qundylyqtaryn saqtaı otyra álemdegi ozyq úrdisterdi boıyna sińirip aldy. Osy turǵyda «Rýhanı jańǵyrý» baǵdarlamasy kóptegen ózekti máseleni kóterdi. Dástúrimizdi bilý jetkiliksiz, ony qorǵaýymyz kerek», - deıdi saıasattanýshy Berik Ábdiǵalıuly.

Onyń aıtýynsha, bizdiń kóp salt-dástúrimiz ekzotıkaǵa aınalyp barady.

«Qala báribir óziniń zańdylyǵyn jasaıdy. Mysaly, qazirgi ýaqytta qalada bári qazaqsha sóıleıdi, biraq is-qımyl eýropalyq bolyp ketken. Ultty ult qylyp otyrǵan tilimiz ǵana emes, ol salt-dástúrimiz, dinimiz ben dilimiz. Osyny qalaı jastarǵa beıimdeı alamyz, osy jaǵyn oılaýymyz kerek. Osy jaǵyn zerttep kórýimiz kerek», - deıdi ol.