«Daryn» syılyǵyna ótinim qabyldaý bastaldy
Bul týraly Aqparat jáne qoǵamyq damý mınıstrligi Jastar jáne otbasy isteri komıtetiniń tóraǵasy Shahmardan Baımanov ortalyq kommýnıkatsııalar qyzmetinde ótken brıfıngide aıtty.
«2021 jylyǵy 20 mamyrdan «Daryn» syılyǵyna úmitkerlerdiń qujattaryn qabyldaý bastaldy. Barlyq talantty jastardy atalǵan baıqaýǵa qatysýǵa shaqyramyz. Ótinimderdi qabyldaý bizde 10 tamyzǵa deıin júrgiziledi. Tolyq málimet Aqparat jáne qoǵamdyq damý mınıstrliginiń resmı saıtynda qoljetimdi. «Daryn» syılyǵyna úmitkerlerge qoıylatyn negizgi talap – syılyq alýǵa ótinimderdi qabyldaý aıaqtalǵanǵa deıingi sátte jasy 29-ǵa tolmaǵan bolýy kerek. Úmitker jastardy ortalyq, jergilikti memlekettik organdar, oqý oryndary, shyǵarmashylyq uıymdar men qoǵamdyq birlestikter usyna alady», - dedi mınıstrlik ókili.
Onyń aıtýynsha, syılyq aıasynda beriletin nomınatsııa tizimi ózgermegen.
«Baıqaý ádebıet, ǵylym, dızaın jáne beıneleý óneri, jýrnalıstıka, klassıkalyq mýzyka, qoǵamdyq qyzmet, sport, teatr jáne kıno,estrada, halyq shyǵarmashylyǵy atty 10 nomınatsııa boıynsha ótedi. Ózderińizge belgili, «Daryn» memlekettik jastar syılyǵyn talantty, belsendi shyǵarmashylyq, halyqaralyq jáne respýblıkalyq konkýrstar men festıvaldardyń, túrli sharalardyń laýreattary, respýblıkalyq jáne halyqaralyq deńgeıdegi sporttyq jarystardyń júldegerleri men jeńimpazdary, sondaı-aq, túrli qalalarda qoǵamdyq damytýda súbeli úles qosyp júrgen Qazaqstan Respýblıkasynyń 29 jasqa deıingi azamattary qatysa alady. Búginge deıin 294 adam «Daryn» memlekettik jastar syılyǵynyń ıegeri atandy», - dedi Shahmardan Baımanov.