«Dármek» operatsııasy: 40 medıtsına qyzmetkeri jaýapkershilikke tartyldy
«Esirtki quraldarynyń, psıhotroptyq zattar men prekýrsorlardyń resmı aınalymyndaǵy zań buzýshylyqtardy anyqtaý maqsatynda Іshki ister mınıstrligi «Dármek» arnaıy aýqymdy operatsııasyn júrgizdi. 5 kún ishinde 877 nysan, onyń ishinde dárihanalar men qoımalar, emdeý-aldyn alý mekemeleri jáne ónerkásiptik kásiporyndar tekserildi. Qazirgi ýaqytta «dárihanalyq» nashaqorlyq keń tarala bastaǵany belgili. Sondyqtan polıtseıler esirtkige uqsas mas qylatyn jáne táýeldilikti týǵyzatyn dári-dármekterdi retseptisiz bosatý faktilerin anyqtaýǵa basa nazar aýdardy», - dedi resmı ókil aptalyq brıfıng barysynda.
Nurdildá Orazdyń dereginshe, esepke alynǵan preparattardy retseptisiz bosatýdyń 56 faktisi anyqtalyp, 12 tonna prekýrsordyń aınalymy shekteldi. Operatsııa barysynda 21 qylmystyq quqyq buzýshylyq anyqtaldy. Onyń ishinde 17-si esirtki quraldarymen jumys isteý erejelerin buzý, 4-eýi ýly zattardyń, sondaı-aq esirtki quraldaryn, psıhotroptyq zattardy daıyndaý úshin paıdalanylatyn zattardyń zańsyz aınalymyna qatysty boldy.
«Baqylaýdaǵy zattar aınalymy salasynda 99 ákimshilik quqyq buzýshylyq anyqtaldy. Onyń ishinde obektilerdi tehnıkalyq nyǵaıtý talaptaryn buzýǵa qatysty 34 fakti, lıtsenzııalaý normalaryn buzýǵa baılanysty 9 fakti tirkeldi. Ákimshilik jaýapkershilikke 40 medıtsına qyzmetkeri tartyldy. Máselen, Atyraý turǵyny psıhotroptyq preparattardy satýmen aınalysqan. Odan kúshti áser etetin 58 plastınka men 31 quty preparattar tárkilengen», - dedi ol.
Onyń atap ótýinshe, saqtaý talaptary buzylǵan nemese quramynda esirtki bar satylymdaǵy barlyq preparattar aınalymnan alyndy.
«Atap aıtqanda, 2 myńnan astam esirtki quraldary ampýlasy, 1600-den astam tabletka jáne 1800 psıhotroptyq zattar ampýlasy tárkilendi», - dedi resmı ókil.