Dáriniń baǵasyn ósirgender esebinen bıýdjetke 1,3 mlrd teńge tabys túsken
13:25, 22 Jeltoqsan 2016
ASTANA. QazAqparat - Dári-dármek baǵasyn ósirgenderge aıyppul salý arqyly bıýdjetke 1,321 mlrd teńge túsken. Bul týraly Senat depýtattarynyń suraǵyna jaýap bere otyryp, QR Ulttyq ekonomıka vıtse-mınıstri Marat Qusaıynov málim etti,dep habarlaıdy QazAqparat.
«Biz Batys Qazaqstan oblysynda, Shyǵys Qazaqstan oblysynda, Astana men Almaty qalalarynda tergeý júrgizip, qylmystyq jáne ákimshilik ister qozǵadyq. Sonyń nátıjesinde, elimizdiń bıýdjetine 1 mlrd 321 mln teńge aıyppul tólendi. Kelesi jyly da óńir-óńirde dári-dármektiń baǵasyn turaqtandyrý baǵytynda jumys júrgizemiz»,-dedi Marat Qusaıynov.
Aıta keteıik, vıtse-mınıstr búgin Senatta «Qazaqstan Respýblıkasynyń keıbir zańnamalyq aktilerine básekelestik jáne turǵyn úı qurylysyna memlekettik qoldaý kórsetý máselesi týraly ózgerister men tolyqtyrýlar engizý týraly» zań jobasyn tanystyrdy.