Daryndy jastardyń shetel asýyn azaıtý úshin ne isteldi

<p>ASTANA. KAZINFORM &ndash; Ǵylym jáne joǵary bilim mınıstrligi halyqaralyq ýnıversıtetterdiń fılıaldaryn Qazaqstanda ashý jumysyna qatysy túsinik berdi.</p>

- Sheteldik joǵary oqý oryndarymen yntymaqtastyq, eń aldymen, joǵary bilim men ǵylymdy damytý tujyrymdamasynyń strategııalyq kórsetkishterin jáne halyqaralyq akademııalyq reıtıngterdi júzege asyrýǵa baǵyttalady. Sheteldik stýdentterdiń úlesin arttyrý, daryndy jastardyń shetel asýyn azaıtý, ınnovatsııalyq bilim berý men ǵylymı jobalardyń úlesin arttyrý maqsatynda Mınıstrlik birqatar keshendi sharalardy qabyldap jatyr. Máselen, Ortalyq Azııanyń joǵary bilim berý keńistigin qurý jáne álemdik deńgeıdegi jetekshi ýnıversıtetterdiń fılıaldaryn ashý eskerilgen. Sondyqtan QR Ǵylym jáne joǵary bilim mınıstrligi álemniń barlyq negizgi aımaqtaryn jáne akademııalyq artyqshylyq ortalyqtaryn qamtıtyn bilim berý habyn qurý boıynsha mańyzdy jumysty atqaryp otyr, - delingen Ǵylym mınıstrliginiń Kazinform agenttigine bergen jaýabynda.

Qazirgi kezde joǵary bilim jáne ǵylym salasyndaǵy halyqaralyq yntymaqtastyq 45 úkimetaralyq jáne vedomstvoaralyq halyqaralyq kelisim aıasynda júzege asyrylyp jatyr. Qazaqstannyń joǵary oqý oryndary 82 eldiń ýnıversıtetterimen 6073 halyqaralyq kelisim jáne shart negizinde yntymaqtastyqty jalǵastyryp otyr.

- Habtyń negizgi maqsaty - halyqaralyq bilim berý baǵdarlamalarynyń sanyn arttyrý, tehnologııalar men úzdik halyqaralyq tájirıbelerdi transfertteý jolymen strategııalyq seriktestikter qurý, sondaı-aq daryndy jastardyń shetel asýyn azaıtý arqyly álemdik bilim berý keńistigine ıntegratsııalaný. Osy rette QR Prezıdenti Qasym-Jomart Toqaevtyń 2022 jyly bergen tapsyrmasyna sáıkes, sheteldik úzdik joǵary oqý oryndaryn elimizde fılıaldaryn ashýy boıynsha belsendi jumys atqarylyp jatyr. Qazir 23 sheteldik ýnıversıtetpen strategııalyq seriktestik ornatylyp, taǵy 10 strategııalyq seriktestikti ornatý boıynsha jumystar jalǵasady, - dep atalyp ótken vedomstvo aqparatynda.

Bıyl shilde aıynda elimizde 19 sheteldik joǵary oqý oryndarymen bilim berý baǵdarlamalary júzege asyrylyp jatqanyn jazǵan edik.

Jaqynda Ǵylym jáne joǵary bilim mınıstrligi jekemenshik joǵary oqý oryndaryndaǵy bilim sapasyna qatysty kemshilikter anyqtalǵanyn málim etti.