Dárilik zattar úshin 100% aldyn ala tólem jasaldy – Medsaqtandyrý qory

NUR-SULTAN. QazAqparat – Áleýmettik medıtsınalyq saqtandyrý qory halyqty dárilik zattarmen qamtamasyz etý úshin 100% tólem jasady. Bul týraly «Áleýmettik medıtsınalyq saqtandyrý qory» KEAQ Basqarma tóraǵasy Bolat Tókejanov aıtyp berdi, dep habarlaıdy QazAqparat tilshisi.

«Dári-dármekpen qamtamasyz etýdegi kedergilerdiń aldyn alý úshin Áleýmettik medıtsınalyq saqtandyrý qory KEAQ «SQ-Farmatsııa» birlesip jasalǵan kelisimshart somasynyń 100% aldyn ala tóledi. Bul biryńǵaı dıstrıbıýtorǵa jyl sońyna deıin jetkiziletin preparattar úshin jetkizýshiler men óndirýshi zaýyttarǵa aldyn ala tólem jasaýǵa múmkindik berdi. Dári-dármekpen qamtamasyz etýdi jaqsartý úshin qajetti sharalar qoldanylýda», - dedi spıker Ortalyq kommýnıkatsııalar qyzmetinde.

Onyń aıtýynsha, Densaýlyq saqtaý mınıstrligi qosymsha bes dári-dármek túrin engizý máselesin qarastyryp jatyr. Bul dáriler de aldyńǵy qatarda júrgen dárigerlerdiń taǵaıyndaýymen qoljetimdi bolmaq.

«Densaýlyq saqtaý mınıstrligi buıryqqa ózgerister engizgennen keıin, bizdiń qor óńirlik densaýlyq saqtaý basqarmalarynyń ótinimderi negizinde olardy úzdiksiz satyp alý úshin qarjylandyrýdy qamtamasyz etedi», - deıdi qor basshysy.

Buǵan deıin Bolat Tókejanov koronavırýsqa qarsy kúres sharalaryna 56,7 mlrd teńge bólingenin aıtty.

Sonymen birge, koronavırýstyq ınfektsııanyń jeńil deńgeıindegi bir naýqasqa – 292 600 teńge, ortasha deńgeıdegi naýqasqa – 446 100 teńge, aýyr naýqasty emdeýge – 1,5 mln teńge tarıf bekitilgen.

Naýryz-maýsym aılarynda el aýrýzanalarynda 150 myń adam koronavırýs pen pnevmonııadan emdelip shyqqan.