Dárigerlerdiń qatesin Meırambek túzetpekshi

ASTANA. 10 qazan. QazAqparat - Almatyda 20 qazanda Meırambek Besbaev bastaǵan «Ónege» jýrnalynyń ujymy «UnitýKZ» qaıyrymdylyq qorymen birigip qaıyrymdylyq kontsertin ótkizedi.

Shyn.kz saıtynyń jazýynsha, bul shara óńeshi biteý bolyp týylǵan aqmolalyq 1 jasar sábı Aılan Dáýletbaevaǵa kúrdeli ota jasaý úshin qarajat jınaýǵa arnalǵan kórinedi.

«Óńeshi men asqazany qosylmaǵandyqtan bala óz erkimen tamaqtana almaıdy. Qazaqstanda jasalǵan óńesh pen asqazandy qosýǵa ota jasaǵannan keıin birde-bir bala tiri qalmaǵan. Al Aılanǵa Qazaqstanda 5 ret ota jasalǵanymen, onyń jaǵdaıy áli aýyr. Reseı dárigerleri balany emdeýden bas tartqan, sebebi qazaqstandyq dárigerler Aılanǵa qajet emes otalardy jasap, onyń ómirine orasan zor nuqsan keltirgen. Aılanǵa kómektesýge tek Izraıldiń dárigerleri kelisip otyr. Bir jastaǵy Aılan ómir súrgisi keledi. Ómirge qulshynǵan sábıge qol ushyn bereıik, aǵaıyn. Qazir Aılannyń qorynda 10 myń dollar ǵana aqsha bar. Ony emge jiberý úshin taǵy da qosymsha qarjy jınaý qajet» - delingen habarlamada.

Uıymdastyrýshylardyń habarlaýynsha, kontsertten túsken qarjy tolyǵymen Aılannyń shotyna aýdarylady. Kontsertke qazaq estradasynyń tanymal juldyzdary: Maqpal Júnisova, Roza Rymbaeva, Janbolat pen Jazıra, Aqmaral Leýbaeva, Janar Aıjanova, Jubanysh Jeksenuly, Shahızada, Madına Sádýaqasova, Merýert Túsipbaeva, Roza Álqoja, Indıra Rasylhan, «Denar» toby, «Asyl» toby, «Azııa» toby, Erlan Orynbasarov, Tańat Mamyrhanov, Berkýt pen Aısha jáne t.b. ánshiler men «Óner qyrandary» ázil-syqaq komandasy qatysady.

Kontsert 20 qazan kúni keshki saǵat 19.00-de «Qazaqkontsert» zalynda ótedi (Abylaıhan men Qazybek bı kósheleriniń qıylysy).