Dárigerler Lenın shahtasynda zardap shekken 4 kenshiniń búgingi háli týraly aıtty

QARAǴAND. QazAqparat – Dárigerler Shahtınskidegi Lenın atyndaǵy shahtada oryn alǵan apattan keıin aýrýhanaǵa jetkizilgen tórt naýqastyń jaǵdaıy týraly aıtyp berdi, dep habarlaıdy QazAqparat tilshisi.

Qaraǵandy qalasynyń H.J.Maqajanov atyndaǵy kópsalaly aýrýhanasynyń dárigerleri Lenın atyndaǵy shahtadaǵy apat kezinde zardap shekken tórt kenshiniń jaǵdaıy jaıly aıtyp berdi. Olardyń ekeýi «ýly gazben ýlanǵan» degen dıagnozben toksıkologııa bólimshesinde jatyr.

Taǵy ekeýi Shahtınsk qalasynan Qaraǵandydaǵy aýrýhanaǵa sanavıatsııamen jetkizilip, ota jasaldy. Olarda gazben ýlanýdan bólek bas jaraqattary anyqtaldy.

«Toksıkologııa bólimshesindegi patsıentterdiń jaǵdaıy turaqty. Belgili bir oń dınamıka baıqalady. Sanavıatsııa jelisi boıynsha jetkizilgen jáne operatsııa jasalǵan patsıentterdiń jaǵdaıyna keletin bolsaq, búgingi kúni olarda da oń dınamıka baıqalady. Olar reanımatsııa bóliminde. Naýqastar esin biledi, ókpeni jasandy jeldetý apparatynan alyndy. Qazirgi ýaqytta jaǵdaılary turaqty-aýyr», - dep túsindirdi professor H.J. Maqajanov atyndaǵy kópsalaly aýrýhana dırektorynyń medıtsınalyq bólim boıynsha orynbasary Talǵat Júken.

Esterińizge sala keteıik, keshe túnde «ArselorMıttal Temirtaý» AQ Kómir departamentiniń Lenın atyndaǵy shahtasynda apat bolyp, saldarynan 5 kenshi qaza tapty.

TJ faktisi boıynsha QR QK 277-babynyń 3-bóligi boıynsha qylmystyq is qozǵaldy.