Dárigerler qarda júretin kólik qaqqan eki aqtóbeliktiń jaǵdaıy týraly aıtty

AQTÓBE. QazAqparat – Aqtóbede qarda júretin kólik qaǵyp, aýrýhanada jatqan eki jasóspirimniń jaǵdaıy birqalypty. Otadan soń em qabyldaǵan ekeýi de úıine shyǵady, dep habarlaıdy QazAqparat tilshisi.

Qaıǵyly oqıǵa 28-qańtar kúni boldy. «Taý» demalys bazasynda qarda júretin kólikti júrgizgen bozbala bir top adamdy qaǵyp ótken.

Olardyń arasynda bir jastan asqan balasyn kóterip júrgen qala turǵyny boldy.

Oblystyq polıtsııa departamenti baspasóz qyzmetiniń habarlaýynsha, 40 jastaǵy áıel oqıǵa ornynda kóz jumdy. Ózgeleri jedel járdem kóligimen oblystyq balalar aýrýhanasyna jetkizildi. Olardyń kóbiniń mıy shaıqalǵan, bas mı jaraqatyn alǵan.

«Qazir qarda júretin kólik qaǵyp ketken eki bala jatyr. Onyń biri 16 jasta. Jabyq bas-mı jaraqaty, mı shaıqalýy dıagnozy qoıylǵan. Onyń oń jaq aıaǵy zaqymdanǵan. Jansaqtaý bóliminen shyqty. Jaǵdaıy jaqsy. Osy aptada úıine jiberemiz. Sonymen birge 12 jastaǵy qyz da bas-mı jaraqatyn alǵan. Travmatologııadan bet-jaqsúıek hırýrgııasy bólimine aýystyryldy. Áli de em jasap, ambýlatorly kúnde em qabyldaýǵa jiberemiz», - dedi oblystyq balalar aýrýhanasynyń bas dárigeri Erbol Japaqov.