Dárigerler halyqqa «aýyrmaýdyń jolyn izdeýdi» úıretýi qajet - depýtat

ASTANA. QazAqparat - Dárigerler halyqqa «aýyryp em izdegenshe, aýyrmaýdyń jolyn izdeýdi» úıretýi qajet. Memleket basshysy Nursultan Nazarbaevtyń Joldaýynyń negizgi baǵyttary talqylanǵan Astana qalasynyń №10 aýrýhanasynda QR Parlament Májilisiniń depýtaty Maıra Aısına osyndaı pikir bildirdi, dep habarlaıdy QazAqparat tilshisi.

«Elbasy óziniń dástúrli Joldaýlarynda elimizdegi azamattardyń ómir sapasyn qalaı kóterý kerektigin jıi aıtady. Óziniń kezekti Qazaqstan halqyna Joldaýynda da Memleket basshysy eń basty másele retinde halyqtyń ál-aýqatyn qalaı kóteremiz dep, kópti osy iske jumyldyryp otyr. Memleket tarapynan tıisti jumystar júrgizilip jatsa, ekinshi jaǵynan ol tapsyrmalardyń qalaı júzege asyrylyp jatqanyn, halyqtyń qajettiligi men muń-muqtajyn bilýimiz kerek. Halyq qalaı qabyldaıdy degen suraqtyń jaýabyn bilýge tıispiz. Osy maqsatpen biz - Májilis depýtattary el aralap júrmiz. Bizdiń jumysymyzdy dárigerlerden bastaý sebebimiz - adamı resýrs bárinen qymbat», - deıdi Májilis depýtaty.

Onyń aıtýynsha, depýtattar qaladaǵy №10 aýrýhanaǵa patsıentterdiń pikir-usynystaryn bilip, dárigerlerdiń qyzmet sapasyn tekserý úshin arnaıy kelgen.  

«Astanada halyq kóp turady. Aýrýhanalar, dárigerler jetispeıdi. Astana túgili respýblıka boıynsha osyndaı máseleler bar. Sondyqtan, eń birinshi halyqtyń áleýmettik kóńil-kúıi qalaı ekenin bilý úshin kelip otyrmyz», - deıdi ol.

Maıra Aısına óz sózinde memleket tarapynan kóptegen sharýalar júzege asyrylyp jatqanyn atap ótti. Bilim men densaýlyq salasyna qarajat ta bólinedi.

«Biraq, adamı qarym-qatynasqa kóp nárse baılanysty.Sol sebepten halyqpen kezdeskende de aıtyp júremiz: adamnyń densaýlyǵynyń 15 paıyzy ǵana dárigerlerge baılanysty. Óz densaýlyǵynyń 85 paıyzy halyqtyń óz qolynda. Sondyqtan, qazirgi dárigerlerge aıtatynymyz, tek dári-dármekterge júginbeı, adamdardyń psıhologııasyna, óz densaýlyǵyn jaqsartý máselesine kóńil aýdartýǵa tyrysqymyz keledi. Neni paıdalaný kerek? Іshetin sý men jeıtin tamaqty qalaı tekserý kerek. Dárigerler halyqqa osyny túsindirse deımiz. Halyqpen de kezdeskende óz densaýlyǵyna basa mańyz berýdi aıtyp júrmiz», - deıdi Parlament Májilisiniń depýtaty.

Maıra Aısınanyń sózine qaraǵanda №10 qalalyq aýrýhana endi ǵana qoldanysqa berilip jatqandyqtan, mekemeni áli de jabdyqtaý kerek. Ol tsıfrlandyrý isine áleýmettik nysandardyń kóńil aýdarýy kerektigin atap ótti.

Eske sala ketsek, Memleket basshysy Nursultan Nazarbaev halyqqa arnaǵan bıylǵy Joldaýynda medıtsına qyzmetkerleriniń jalaqysyn kóterýdi tapsyrǵan bolatyn.