Dárigerler Aqsý zaýytynda zardap shekken órt sóndirýshiniń jaǵdaıyn aıtty

PAVLODAR. QazAqparat – Pavlodarlyq dárigerler Aqsý ferroqorytpa zaýytyndaǵy órt kezinde shatyrdan qulap ketken órt sóndirýshiniń jaǵdaıy týraly aıtty, dep habarlaıdy QazAqparat tilshisi.

«Saǵat 18.50-de Aqsý qalalyq aýrýhanasynyń qabyldaý bólimine shuǵyl medıtsınalyq kómek brıgadasy oqıǵa ornynan – Aqsý ferroqorytpa zaýytynan 1993 jyly týǵan er adamdy jetkizdi.

Jumys orny: Pavlodar qalasy, 1-inshi Mamandandyrylǵan órt sóndirý bólimshesi, aǵa órt sóndirýshi», - dep málim etti QazAqparat tilshisine Pavlodar oblystyq Densaýlyq saqtaý basqarmasynyń baspasóz qyzmetinen.

Medıtsına mamandarynyń aıtýynsha, er adam Aqsý ferroqorytpa zaýytynda otpen kúres kezinde shatyrdan qulap ketken. Oǵan qajetti emdik-dıagnostıkalyq sharalar jasaldy.

«Er adamǵa jabyq bas-mı jaraqaty, bas mıynyń shaıqalýy, keýde qýysynyń soǵylýy, jambasynyń soǵylýy, oń jaq kári jilik-bilezik býyny aralyǵynyń sozylyp ketýi dıagnozy qoıylǵan. Býynyna gıpspen ımmobılızatsııa jasaldy, travmatologııa bólimshesine jatqyzyldy. Jaǵdaıy ortasha aýyr, turaqty», - dep qosty vedomstvodan.

Buǵan deıin habarlaǵanymyzdaı, 21 maýsym kúni, saǵat 16.00-de «Qazhrom» Transulttyq kompanııasy» AQ-ǵa qarasty Aqsý ferroqorytpa zaýytynda iri órt tutandy.

Otpen kúreske jumyldyrylǵan órt sóndirýshilerdiń biri aýrýhanaǵa jetkizildi.

Tilsiz jaýdyń taralýy 20:52-de toqtatylyp, 22:40-ta tolyǵymen sóndirildi.