Dárigerler 350 myńnan asa ota jasady

NUR-SULTAN. QazAqparat – Elimizdiń dárigerleri naýqastarǵa 350 myńnan astam ota jasady. Bul týraly búgin Úkimet otyrysynda densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Qoljetimdi medıtsınalyq kómekti qamtamasyz etý aıasynda ótken kezeńde medıtsınalyq-sanıtarııalyq alǵashqy kómek uıymdary 51 mln qabyldaýdy atqardy. Bul – ótken jylmen salystyrǵanda 4 paıyzǵa kóp. Jedel járdem qyzmeti 4 mln jýyq shaqyrtýǵa qyzmet kórsetti. Medıtsınalyq avıatsııa 1 myńnan astam ushýdy júzege asyrdy. Statsıonarlarda shamamen 1,5 mln naýqas emdeldi. 350 myńnan astam ota jasaldy, 200 myńǵa jýyq áıeldi bosandyrý júrgizildi», - dedi Ajar Ǵınııat «Deni saý ult» ulttyq jobasynyń birinshi jartyjyldyqtaǵy nátıjeleri jaıynda baıandaı kele.

Onyń atap ótýinshe, emhanalarda arnaıy mamandarǵa kezektilikti azaıtý maqsatynda jalpy praktıka dárigeriniń joldamasynsyz konsýltatsııalyq-dıagnostıkalyq qyzmetter kórsetý jónindegi jańa qaǵıdalar bekitilip, engizilip jatyr.

«Ótken kezeńde kúrdeli jáne joǵary tehnologııalyq medıtsınalyq qyzmetterdiń 80 túri boıynsha 18 myńnan astam qyzmet kórsetildi. Onkologııalyq kómektiń sapasyn arttyrý úshin Gamma-pyshaq jáne ıAdrolyq medıtsına ortalyqtary jumys isteıdi. Onda 300-den astam operatsııa jasaldy jáne 400-ge jýyq patsıent emdeldi. Semeı qalasynyń ıadrolyq medıtsına ortalyǵynyń biregeıligin atap ótkim keledi. Onda óndiristen dıagnostıka men emdeýge deıin otandyq radıofarmpreparattar tolyq tsıklde qoldanylady», - dedi mınıstr.