Dárigerdiń kásiptik jaýapkershiligin saqtandyrýǵa qatysty AQSh pen Japonııa tájirıbesi pysyqtaldy
«Mınıstrlik medıtsına qyzmetkerleriniń kásiptik jaýapkershiligin saqtandyrýdyń túrli modelderine taldaý júrgizdi. Halyqaralyq tájirıbede medıtsına qyzmetkerlerin qorǵaý úshin qorlar men qaýymdastyqtar (Shvetsııa, Kanada, Danııa) qurý, sondaı-aq jeke naryqtar (AQSh, Germanııa, Japonııa, Túrkııa) arqyly kásiptik jaýapkershilikti mindetti saqtandyrý júıesi qoldanylady», - dedi A. Ǵınııat Májiliste «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde.
Onyń aıtýynsha, joǵaryda aıtylǵan halyqaralyq tájirıbeniń negizinde medıtsına qyzmetkerleriniń kásiptik jaýapkershiligin saqtandyrýdyń ońtaıly tetigi retinde Shvetsııa, Kanada, AQSh, Japonııa jáne Túrkııa modelderi boıynsha beıimdelgen naryqtyq saqtandyrý modelin qoldaný usynylady.
Sonymen qatar ol 2017 jyly mınıstrlik Memleket basshysynyń tapsyrmasy boıynsha Derbes kepildik berý qoryn qurý aıasynda yntymaqtastyq qaǵıdaty boıynsha saqtandyrýdyń áleýmettik modelin usynǵanyn eske saldy (jarna mólsherin medıtsınalyq uıym - 50%, medıtsına qyzmetkeri - 50% dep bólý). Alaıda zań jobasy qoldaý tappaı, qabyldanǵan joq.
«Halyqaralyq tájirıbeni taldaýdyń negizinde, sondaı-aq jurtshylyqtyń, memlekettik organdardyń jáne saqtandyrý kompanııalarynyń qatysýymen júrgizilgen talqylaýlardyń qorytyndysy boıynsha jumys istep turǵan saqtandyrý kompanııalary arqyly medıtsına qyzmetkerleri kásiptik jaýapkershiliginiń júktelgen saqtandyrý modeli qabyldandy. Jumys berýshi - medıtsınalyq uıym saqtanýshy bolady. Al medıtsına qyzmetkerlerin lıtsenzııalaýdy engizý bolashaqta medıtsına qyzmetkerleriniń kásiptik jaýapkershiligin saqtandyrý júıesine qatysýshylardyń jaýapkershiligin bólýge múmkindik beredi», - dedi vedomstvo basshysy.
Onyń sózine qaraǵanda, osy modelge sáıkes, shaǵymdy qaraýdy medıtsınalyq uıym medıatsııa elementterin qoldanyp, sondaı-aq beıindi medıtsınalyq qaýymdastyqtardy tarta otyryp, ishki aýdıt qyzmetiniń deńgeıinde júzege asyratyn bolady. Bul kezeńde másele medıtsınalyq uıymnyń ózinde rettelýi múmkin.
«Patsıent qyzmettiń sheshimimen kelispegen jaǵdaıda, shaǵym saraptamalyq qorytyndy berý úshin Medıtsınalyq jáne farmatsevtıkalyq baqylaý komıtetiniń aýmaqtyq bólimshesine tapsyrylatyn bolady. Oń nátıje shyǵarylǵan jaǵdaıda, shaǵym boıynsha materıaldar, onyń ishinde sot-medıtsınalyq saraptamanyń qorytyndysy medıtsınalyq uıym saqtandyrylǵan saqtandyrý kompanııasyna beriletin bolady», - dedi A. Ǵınııat.
«Patsıentke keltirilgen zııan úshin ótemaqy tóleýdi Densaýlyq saqtaý mınıstrligi aıqyndaǵan jaǵdaılar boıynsha saqtandyrý kompanııasy júrgizedi. Tólemnen bas tartqan jáne sheshimmen qanaǵattanbaǵan jaǵdaıda patsıent sotqa júginýge quqyly. Sotqa júgingen kezde tólem júrgizilmeıdi», - dedi mınıstr.
Budan buryn habarlanǵandaı, medıtsına qyzmetkerleriniń kásiptik jaýapkershiligi boıynsha mindetti saqtandyrý júıesi engiziledi.
Foto: gov.kz