Darıǵa Nazarbaeva: «Jumyspen qamtý-2020» baǵdarlamasy tıimdi jumys jasaýy úshin ne isteý kerektigin barlyǵy oılanǵany mańyzdy
QR Premer-Mınıstriniń orynbasary Darıǵa Nazarbaevanyń tóraǵalyǵymen Úkimet úıinde ótken Vedomstvoaralyq komıssııa otyrysy barysynda «Jumyspen qamtýdyń jol kartasy-2020» baǵdarlamasyn júzege asyrý aıasynda 2012-2015 jyldardaǵy kezeńde jasalǵan jumysqa taldaý jasaldy. Keńeste sondaı-aq memlekettik baǵdarlamaǵa bólingen bıýdjet qarajatyn tıimdi paıdalaný boıynsha usynystar talqylandy.
Densaýlyq saqtaý jáne áleýmettik damý mınıstrliginiń málimetinshe, 2012-2015 jyldary baǵdarlama aıasynda 4 823 ınfraqurylymdyq joba júzege asyryldy. Júzege asyrylǵan jobalarda 63,2 myń adam eńbekpen qamtyldy, onyń 13,9 myńy turaqty jumys oryndaryna turdy.
«Men de sizdermen birge osy baǵdarlamanyń jetistikterine qatty qýanamyn. Ol shyn máninde qajet jáne oń sınergetıkalyq - áleýmettik, ekonomıkalyq jáne saıası áser berdi. Alaıda, osy baǵdarlamanyń tıimdi jumys jasaýy úshin ne isteý kerektigin barlyǵy oılanǵany mańyzdy. Memlekettik baǵdarlama aıasynda jumysqa turǵan adamdardyń eń bolmasa 60-70% turaqty jumysqa ıe bolýy tıis. Bizdiń aldymyzda osyndaı qarapaıym jáne kúrdeli mindet tur», - dedi D.Nazarbaeva.
«Jumyspen qamtýdyń jol kartasy-2020» baǵdarlamasy aıasynda TKSh nysandary - káriz júıesin, sý, gaz, jylý jáne elektrmen qamtý júıelerin, áleýmettik-mádenı nysandardy, sondaı-aq kólik ınfraqurylymy nysandaryn kúrdeli, ortasha jáne aǵymdaǵy jóndeý qarastyrylǵan. Budan ózge, baǵdarlamada eldi mekenderdi abattandyrý qarastyryldy.
Premer-Mınıstrdiń orynbasary memlekettik baǵdarlama júzege asyratyn jobalardy irikteý boıynsha komıssııaǵa jergilikti ózin-ózi basqarý organdaryn tartýdy tapsyrdy.
«Naqty bir eldi mekende bir nárse jasalatyn bolsa, jergilikti turǵyndar mindetti túrde sheshim qabyldaýǵa qatysýlary tıis. Jergilikti turǵyndarmen keńesý qajet. Olar óz aýyldaryn damytý - jol, densaýlyq saqtaý nysany, mektep nemese sport kesheni bolsyn basymdyqtardy tańdaýǵa qatysýy kerek», - dep atap ótti D.Nazarbaeva.
Sondaı-aq, keńes barysynda jumys ornydaryn qurý ǵana emes, sonymen qatar bıýdjetten bólinetin qarajatty tıimdi jumsaý mańyzdylyǵy talqylandy. Osylaısha, bilim berý jáne densaýlyq saqtaý nysandaryna kúrdeli jóndeý júrgizý kezinde ákimdikterge jumystar smetasyna Internet júrgizýdi engizý, sondaı-aq múmkindigi shekteýli adamdar úshin barlyq áleýmettik nysandardyń qoljetimdiligin qamtamasyz etý boıynsha jumystardy eskerý tapsyryldy. Budan ózge, aýyldy eldi mekender arqyly ótetin magıstraldi avtokólik joldaryn jóndeý kezinde belgileýdi qamtamasyz etý jáne túngi ýaqytta jaryqtandyrýǵa erekshe kóńil bólý qajet.
«Jumyspen qamtýdyń jol kartasy-2020» baǵdarlamasynyń birinshi baǵyty boıynsha 2012-2015 jyldardaǵy jumystyń nátıjelerin talqylaýdy qorytyndylaı kele, D.Nazarbaeva ákimdikterge salalyq mınıstrliktermen birge áleýmettik, kóliktik, turǵyn úı-kommýnaldyq ınfraqurylymnyń barlyq nysandary boıynsha elektrondy tolyq qajettilik kartasyn jasaýdy tapsyrdy: sońǵy jóndeý merzimderi, kelesi josparly, aǵymdaǵy jáne kúrdeli jóndeý júrgizýdiń josparlanǵan merzimderi, sondaı-aq qoldanystaǵy nysandardy kórkeıtý nemese jańa nysandardy salýdaǵy qajettilik. Mundaı karta memlekettik baǵdarlama aıasyndaǵy jumystardy josparlaý men baqylaýdy aıtarlyqtaı jetildirýge múmkindik beredi.