Darıǵa Nazarbaeva TúrikPA Bas hatshysymen kezdesti

SANKT-PETERBÝRG. QazAqparat - Qazaqstan Respýblıkasy Parlamenti Senatynyń tóraǵasy Darıǵa Nazarbaeva Túrkitildes memleketter Parlamenttik Assambleıasynyń Bas hatshysy A. Mamaıýsýpovpen kezdesti, dep habarlaıdy «QazAqparat» HAA-nyń menshikti tilshisi.

Kezdesýde TúrikPA-nyń qazirgi qyzmeti, Assambleıanyń kezekti jalpy otyrysyna daıyndyq máseleleri talqylandy. Sondaı-aq taraptar túrkitildes memleketter parlamentteri arasyndaǵy ózara yqpaldastyqty odan ári damytý jóninde pikir almasty.

A. Mamaıýsýpov qazaqstandyq parlamentshilerdiń TúrikPA-daǵy belsendi jumysyn atap ótti.

«Qazaqstan Parlamenti Túrkitildes memleketter Parlamenttik Assambleıasynyń qyzmetine óte belsendi qatysatyny qýantady. Biz qazir Assambleıa jumysyndaǵy máselelerdiń aıasyn keńeıtip jatyrmyz. Osy máselede Qazaqstan parlamentshileriniń úlesi asa mańyzdy», - dedi TúrikPA Bas hatshysy.

A. Mamaıýsýpov Qazaqstan Respýblıkasynyń Tuńǵysh Prezıdenti halyqaralyq, sonyń ishinde túrkitildes memleketter arasyndaǵy parlamenttik yntymaqtastyqty damytýǵa orasan zor úles qosqanyn tilge tıek etti.

«Qazaqstan Respýblıkasynyń Tuńǵysh Prezıdenti, qurmetti Nursultan Ábishuly Nazarbaev Túrkitildes memleketter Parlamenttik Assambleıasynyń damýyna ólsheýsiz úles qosty. Ony qandaı da bir krıterıımen ólsheý múmkin emes. Parlamenttik Assambleıany qurý bastamasyn kótergen de - Nursultan Ábishuly. Bizge tek bildirilgen senimdi aqtaý qalyp otyr», - dep túıindedi TúrikPA Bas hatshysy.

Avtor: Medet Ahmetov