Darıǵa Nazarbaeva senatorlarǵa: Halyqqa jaqyn bolý kerek
Senat tóraǵasynyń orynbasary Bektas Beknazarov senatorlardyń óńirlerge saparlary týraly habardar etti.
Depýtattar elimizdiń barlyq oblystarynyń iri eldi mekenderin, sondaı-aq shalǵaı aýyldardy da aralady. Senatorlar Arys qalasyn qalpyna keltirý, kóp balaly analarǵa, az qamtamasyz etilgen otbasylarǵa ataýly áleýmettik kómek kórsetý máselelerin kóterdi.
«Jergilikti turǵyndar tarapynan kóterilgen túıtkildi máseleler men suraqtardyń birqataryn aldaǵy jumysymyzda zań erejelerine túzetýler engizý arqyly nemese tıisti memlekettik organdarǵa depýtattyq saýaldar joldaý tártibimen olardyń sheshimin tabýǵa meılinshe yqpal etetin bolamyz», - dedi B.Beknazarov.
Parlament joǵarǵy palatasynyń basshysy Darıǵa Nazarbaeva kúzde negizgi zań jobasy respýblıkalyq bıýdjet týraly zań jobasy bolatynyn atap ótti.
«Respýblıkalyq bıýdjet boıynsha jumystardy búginnen bastaǵan jón. Sondaı-aq, Prezıdenttiń saılaý aldy baǵdarlamasyn, Memleket basshysynyń Joldaýyn osy jyldyń jáne sessııanyń sońyna deıin júzege asyrý jóninde qabyldanýy qajet birqatar zań jobalary bar», - dedi Senat tóraǵasy.
Senat qyzmetin odan ári avtomattandyrý týraly aıta kelip, Parlamenttiń joǵarǵy palatasynyń basshysy áriptesterin aqparattyq múmkindikterdi belsendi paıdalanýǵa jáne elektrondy formatta jumys isteýge kóshýge shaqyrdy.
Senat basshysynyń tapsyrmasy boıynsha Senattyń resmı saıty jańǵyrtyldy. Ol azamattarmen, máslıhattarmen jáne aımaqtarmen ózara baılanys ornatýǵa baǵyttalǵan. «Bul depýtattardy óz paraqtaryna udaıy mańyz berýge, olardyń atyna kelip túsken ótinishter men usynystarǵa jedel nazar aýdarýǵa mindetteıdi», - dedi D.Nazarbaeva.
Senat tóraǵasy otyrysty qorytyndylaı kelip, Memleket basshysy belgilegen bılik teńdeýi – «Qýatty Prezıdent - yqpaldy Parlament - esep beretin Úkimet» tolyq kólemde jumys isteýi úshin depýtattar barlyq sharalardy qabyldaýy tıis ekenin atap ótti. «Ýaqyt bizden jańasha oılaýdy, zor jaýapkershilikti talap etedi», - dedi Senat basshysy.
Konstıtýtsııalyq zańnama, sot júıesi jáne quqyq qorǵaý organdary komıteti 27 qyrkúıekte ótetin «Zań shyǵarý úderisterin odan ári jetildirý» taqyryby boıynsha parlamenttik tyńdaýlarǵa daıyndyq jumystarymen aınalysatyn boldy.
Senat basshysy parlamenttik tyńdaýlardyń sıpatyn ózgertýge shaqyrdy. Bıýro músheleri sharanyń nátıjeli bolýy úshin birqatar usynystar aıtty. Atap aıtqanda, kókeıkesti máselelerdi kóterý, jurtshylyq ókilderi men sarapshylardy parlamenttik tyńdaýlarǵa shaqyrý, quqyq qoldaný tájirıbesine basa nazar aýdarý usynyldy.
«Zańdardyń oryndalýy boıynsha monıtorıng jasaý quqyǵy bizde joq. Bul máseleni tyńdaýda talqylaý jáne zańǵa tıisti túzetýler engizýdi usyný kerek. Biz sizdermen aýqymdy jumystardy atqaryp kelemiz, árbir útir-núktesine deıin qaraımyz, túzetýlerimizdi engizemiz. Biraq biz ol zańnyń odan ári qalaı jumys isteıtinin kóre almaımyz, bizge zańnan keıingi qujattar bazasy zań erejesine sáıkes keletini belgisiz bolyp qalady. Mundaı tájirıbeden bas tartý kerek», - dedi D. Nazarbaeva.