Darıǵa Nazarbaeva: Senat – negizgi kadrlyq taǵaıyndaýlarǵa túrtki bolatyn ınstıtýt
Senat tóraǵasy Tuńǵysh Prezıdent – Elbasy Nursultan Nazarbaevtyń strategııasy, Qazaqstannyń Prezıdenti Qasym-Jomart Toqaevtyń saılaý aldy baǵdarlamasy, Qazaqstan halqyna joldaýy barsha qoǵam men memlekettik bılik organdaryna aýqymdy jáne kúrdeli mindetterdi qoıyp otyrǵanyn atap ótti.
«Bul qaıta jańarýlardyń barysynda respýblıka Parlamenti men óńirlik máslıhattardyń róline erekshe basymdyq berilip otyr. Prezıdent Q.Toqaev: «Bizdiń memlekettik bıliktiń formýlasy: myqty Prezıdent – yqpaldy Parlament – esep beretin Úkimet» dep atap kórsetti». Sondyqtan Qazaqstan Respýblıkasy Parlamentiniń Senatyn nyǵaıtý, onyń qyzmetin jańa mazmunmen tolyqtyrý, Senat pen onyń depýtattarynyń qoǵamdyq jáne áleýmettik-saıası protsesterde joǵary deńgeıde belsendilik tanytýy – bizdiń tikeleı mindetimiz», - dedi D.Nazarbaeva.
Senat basshysy Konstıtýtsııaǵa sáıkes Parlamenttiń Joǵarǵy palatasyna eleýli dárejede ókilettik berilgenin atap ótti.
«Senat – negizgi kadrlyq taǵaıyndaýlarǵa túrtki bolatyn ınstıtýt. Elimizdiń bıýdjetin qalyptastyrý men bekitý, sondaı-aq onyń atqarylýyn baqylaý kezinde ol sheshýshi qyzmet atqarady. Senat Qazaqstannyń óńirleriniń atynan ókildik etedi jáne óńirlik máslıhattardyń úni bolyp tabylady. Respýblıkalyq zań shyǵarý deńgeıinde eń úzdik, tolyqqandy jáne konstıtýtsııalyq turǵydan resimdelgen nysanda óńirlerdiń múddesin bildiredi», - dedi Tóraǵa.
Joǵarǵy palata basshysy Senat – memleketimizdiń buljymas negizi bolyp tabylatynyn atap ótti. Memleket pen qoǵam úshin mańyzdy ornyqtyrýshy fýnktsııany atqarady. D.Nazarbaevanyń pikirinshe, óńirler men respýblıkalyq deńgeıdiń, óńirlerdiń óz arasynda dıalog bolýy kerek.
Darıǵa Nazarbaeva qazirgi tańda elimizdiń damýy men ilgeri jyljýy úshin aldaǵy ýaqytta durys oılastyrylǵan sheshimder qajet ekenin, bul sheshimder zamanaýılyq pen danalyqty, jańalyqtar men ótken urpaqtyń tájirıbesin ushtastyra alýy tıis ekenin atap ótti jáne osyndaı túsinikten kelip, Parlamenttiń Joǵarǵy palatasynda keńesshi organ – Senatorlar keńesin qurý ıdeıasy týyndaǵanyn, onyń quramyna aldyńǵy shaqyrylymdardaǵy neǵurlym bedeldi, eń tájirıbeli Senat depýtattary shaqyrylyp otyratynyn aıtty.
«Bul Keńes danalyqty, tájirıbeni, ustamdylyqty jáne turaqtylyqty bildiredi. Biz ony tikeleı dıalog jasaıtyn, ózekti problemalardy talqylaıtyn, olardy sheshý jóninde usynymdardy daıyndaıtyn ashyq alań retinde qyzmet etedi dep oılaımyz. Senatorlar keńesi jumys istep otyrǵan depýtattyq korpýstyń senimdi tiregine aınalady dep úmittenemiz. Bizge Sizderdiń bilimderińiz, tájirıbelerińiz, kúsh-qýattaryńyz, Qazaqstannyń shynaıy patrıottary retindegi belsendi ómirlik ustanymdaryńyz qajet. Óıtkeni barshamyzǵa ortaq bir ǵana Bıik Maqsat bar, ol – qoǵam men memleket múddesine qyzmet etý», - dep atap ótti Tóraǵa.
Senator Vladımır Volkov otyrysqa qatysýshylardyń nazaryn Memleket basshysy bıliktiń zańnamalyq organy retinde Parlamenttiń rólin kúsheıtý mindetin qoıǵanyna aýdardy. Osy oraıda senator Parlamenttik tyńdaýlar men Úkimet saǵattarynda, onyń ishinde zań jobalarynyń tujyrymdary boıynsha qabyldanǵan usynymdardyń oryndalýyn; depýtattyq saýaldarǵa beriletin jaýaptardyń tolyqtyǵy men ýaqtylylyǵyn baqylaýdy kúsheıtý qajet ekenin atap ótti. V.Volkov: «Qajet jaǵdaıda Úkimet múshesiniń qyzmeti týraly máseleler boıynsha esebin tyńdaý qorytyndysy boıynsha ony qyzmetinen bosatý týraly Prezıdentke júginý quqyǵyn paıdalanýdy», - usyndy.
Senat jumysyn jetildirýge qatysty Keńes músheleri Ó.Baıgeldi, J.Erǵalıev, G.Qasymova, M.Altynbaev, B.Áıtimova men Z.Fedotova óz usynystaryn ortaǵa saldy.
Dýlat Qusdáýletov senatorlar jarııa etetin depýtattyq saýaldardyń tıimdiligine qol jetkizý qajettigin atap ótti. «Óńirlik sıpatqa ıe depýtattyq saýaldardy tıisti mınıstrge, ákimge, mekemege joldaý kerek. Jaýap qanaǵattandyrmasa, kelesi saýaldy Premer-mınıstrdiń atyna joldap, atalǵan basshynyń jaýapkershiligi týraly másele kóterý kerek. Nege deısiz ǵoı? Sebebi bul bizge «Úkimet pen ortalyq atqarýshy organdar arasyndaǵy ókilettikterdi shekteý týraly» Zańdy jasaýǵa múmkindik beredi», - dedi D.Qusdáýletov.
Otyrys aıasynda aıtylǵan birqatar usynystar Senat reglamentin ózgertýge baǵyttaldy. Ol usynystardyń barlyǵy zerdelenip, jumys barysynda eskeriletin bolady. «Qubylmaly álemde, jańa jaǵdaı men jańa ýaqytta Senattyń rólin túsiný qajet. Reglament – bul eń aldymen, qoǵam, el, memleket pen Konstıtýtsııa aldyndaǵy quqyq ókilettigi men jaýapkershiliktiń úılesimi. Sondyqtan ózgerister de engizý qajet. Sondaı-aq, ókilettikter men jaýapkershilik deńgeıin qaıta qarap, reglamentte bekitý kerek», - dedi Ǵanı Qasymov.
Senatorlar keńesin qurýdyń ózektiligi týraly sóz etken memlekettik jáne qoǵam qaıratkeri Zınaıda Fedotova: «Bul óte qajet jáne qundy jumys. Bul Senat pen jalpy memleket úshin úlken kómek bolady. Biz sóz júzinde emes, is júzinde qoǵam úshin paıdaly qyzmet atqaramyz», - dedi.
Otyrys barysynda Birǵanym Áıtimova Senatorlar keńesi Tóraǵasynyń orynbasary, Nurlan Qylyshbaev Keńes hatshysy bolyp saılandy.
Otyrys qorytyndysy boıynsha Senatorlar keńesiniń Jumys jospary bekitildi.