Darıǵa Nazarbaeva RF tarapyna Jaıyq ózeniniń mártebesi máselesin qarastyrýdy usyndy

MÁSKEÝ. QazAqparat – RF Federaldyq Jınalysy Federatsııa Keńesiniń spıkeri Valentına Matvıenkomen kezdesý barysynda Qazaqstan Respýblıkasy Parlamenti Senatynyń tóraǵasy Darıǵa Nazarbaeva Jaıyq ózeniniń mártebesi týraly máseleni qaraýdy usyndy, dep habarlaıdy «QazAqparat» HAA menshikti tilshisi.

Ol 2016 jyly eki el arasynda Jaıyq ózeniniń ekojúıesin saqtaý týraly kelisimge qol qoıylǵanyn eske saldy. Qujatta Jaıyq ózeni boıynsha biryńǵaı saraptamalyq organ – komıssııa qurý máselesi qarastyrylǵan.

«Biraq, bul másele áli de sheshilmeı keledi. Úkimetaralyq komıssııalardyń turaqty otyrystary, árıne, bul máselemen kúndelikti aınalysa almaıdy. Memlekettik organdardyń, iri paıdalanýshylardyń, úkimettik emes uıymdardyń, sondaı-aq sýdy únemdeý men transshekaralyq ózenderdiń problemalaryn zertteıtin ǵylymı-zertteý ınstıtýttarynyń ókilderi birlese quratyn komıssııanyń paıdasy zor bolar edi», - dedi Qazaqstan Respýblıkasy Senatynyń tóraǵasy.

Darıǵa Nazarbaeva Valentına Matvıenkoǵa osyǵan nazar aýdaryp, sheshim qabyldaýǵa kómektesýdi surady.

«Sondaı-aq, Jaıyq ózeniniń ekologııasy boıynsha Qazaqstan men Reseı úshin memlekettik maqsatty baǵdarlamany ázirlegen durys bolar edi. Jaıyq ózeniniń mártebesin de qarastyrǵan jón. Jaıyq – erekshe memlekettik mańyzy bar sý obektisi bolýy kerek», - dedi ol.

Senat spıkeri atalmysh másele keshendi túrdegi sheshimdi talap etetinin atap ótti.

Foto: pikabu.ru