Darıǵa Nazarbaeva RF Federatsııa Keńesiniń tóraıymymen kezdesti

ASTANA. QazAqparat - QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva Máskeýde Reseı Federatsııasy Federaldyq Jınalysy Federatsııa Keńesiniń tóraıymy Valentına Matvıenkomen kezdesti, dep habarlaıdy QazAqparat QR Parlamenti Senatynyń baspasóz qyzmetine silteme jasap.

D.Nazarbaeva QR Parlamenti Senaty Halyqaralyq qatynastar, qorǵanys jáne qaýipsizdik komıteti men Federatsııa Keńesi Halyqaralyq ister komıtetiniń birlesken otyrysynyń qorytyndylary týraly áńgimeledi. Senatordyń pikirinshe, Qazaqstan Parlamenti Senaty men Federatsııa Keńesi arasyndaǵy Yntymaqtastyq jónindegi komıssııanyń jumysymen qosa parlamentaralyq ózara is-qımyldyń osyndaı tetigi Eýrazııalyq yntymaqtastyq jolynda týyndaıtyn naqty máseleler men kedergilerdi jedel sheshý úshin óte tıimdi.
V.Matvıenko eki eldiń parlamentteri joǵarǵy palatalarynyń múshelerin Qazaqstan men Reseı prezıdentteriniń tóraǵalyq etýimen jyl saıyn ótetin Aımaqaralyq yntymaqtastyq forýmyna belsendi túrde atsalysýdy usyndy.
Federatsııa Keńesiniń basshysy Qazaqstandy BUU Qaýipsizdik Keńesinde tabysty tóraǵalyq etýimen quttyqtady jáne D.Nazarbaevany bıylǵy qyrkúıekte ótetin Eýrazııalyq áıelder forýmyna qatysýǵa shaqyrdy.
Senattyń Halyqaralyq qatynastar, qorǵanys jáne qaýipsizdik komıteti tóraǵasynyń Reseı Memlekettik Dýmasynyń tóraǵasy Vıacheslav Volodınmen kezdesýinde parlamentaralyq ózara is-qımyldy nyǵaıtý men ulttyq zańnamany úılestirý máseleleri talqylandy.
Máskeýge jumys babyndaǵy sapar barysynda Eýrazııalyq ekonomıkalyq komıssııa alqasynyń tóraǵasy Tıgran Sarkısıanmen, Eýrazııalyq ekonomıkalyq komıssııa alqasynyń músheleri (mınıstrler) Tımýr Jaqsylyqov jáne Marat Qusaıynovpen kezdesý boldy.
Eýrazııalyq yqpaldastyqtyń ózekti máselelerin talqylaı kelip, D.Nazarbaeva ıntegratsııalyq úderisterdi jarııa etýdiń jetkiliksizdigi jaıynda atap ótti. Senator EAEO televızııasyn qurý týraly usynys aıtty.