Darıǵa Nazarbaeva: Otandyq bankterge básekeden qorqýdyń qajeti joq
Májilis maquldaǵan zań jobasyn Senatta Ulttyq bank tóraǵasynyń orynbasary Esjan Birtanov qorǵady. Onyń aıtýynsha, kelisim 2014 jylǵy 29 mamyrdaǵy EAEO týraly kelisimsharttyń 70-babyna sáıkes ázirlenip, osy kelisimshartta ortaq qarjy naryǵyn qurý maqsatynda halyqaralyq kelisimdi ázirleý jáne qarjy naryǵy salasyndaǵy zańnamany úılestirýdi kózdeıdi.
«Ortaq qarjy naryǵyn qurý, banktik saqtandyrý jáne baǵaly qaǵazdar naryǵyndaǵy qyzmet kórsetý sektorynda lıtsenzııalardy ózara taný, qarjy naryqtaryna shekteýsiz kirýdi qamtamasyz etý, memlekettik retteýdi jetildirý jáne qarjy naryqtarynda baqylaý men qadaǵalaýdy júzege asyrýdy kózdeıdi. Kelisim 7 baǵytty aıqyndap otyr. Olar: qarjy naryqtaryna qatysýshylarǵa mekeme men qyzmetin qurýyna qatysty talaptar, halyqaralyq standarttarǵa sáıkes qarjy naryǵy salasyndaǵy táýekelderdi retteý, qadaǵalaý talaptary jáne qarjy naryǵynyń qatysýshylaryna qadaǵalaýdy júzege asyrý tártibi, lıtsenzııalardy ózara taný talaptary, qarjy naryǵy salasynda aqparatty jarııa etýdegi talaptar, memlekettik-múshe ınvestorlarynyń qarjy naryǵyna qatysýshylardyń jarǵylyq kapıtalyndaǵy aktsııalardy satyp alýy, qarjylyq qyzmetterdi tutynýshylardyń quqyqtaryn jáne múddelerin qorǵaý jónindegi talaptar», - dedi Esjan Birtanov.
Kelisimde úılestirýdi júrgizý tártibi aıqyndalǵan. Kelisim kúshine engennen keıin 9 aıdyń ishinde Úılestirý jospary ázirlenedi.
Zań jobasyn senatorlar birshama talqylap, maquldady.
«Jalpy, básekeden qorqýdyń qajeti joq. Shetelden bankter kirip, otandyq bankterdiń tynysyn taryltýy múmkin degen syńaıdaǵy úreı bar. Bul úreı – aınalyp kelgende óz bankterimizdiń qorqynyshy. Sebebi, olar óz pozıtsııalary úshin qaýiptenedi. Alaıda qazirgi tańda qarjylyq sektorda problema barshylyq. Uzaq merzimmen, arzan beriletin soma joqtyń qasy. Osydan baryp, shaǵyn jáne orta, iri bıznestiń báriniń tynysy tarylyp tur. Bizdiń bankterdiń bul máseleni retterlik qabilet-qaýqary joq. Sol sebepti, básekege kerisinshe qýanýymyz kerek. Naryqtyq ekonomıkaǵa bet alǵanymyzdy bilesizder. Básekeniń kúshti ortasy bizdiń bankterdiń de jumysyn kúsheıtýge, ózindik ákimshilik isin retteýge muryndyq bolady», - dedi Senat tóraǵasy Darıǵa Nazarbaeva.