Darıǵa Nazarbaeva memlekettik qyzmet kórsetý salasynda tártip ornatýǵa shaqyrdy
Bul týraly Joǵary Palatanyń baspasóz qyzmetine silteme jasap QazAqparat habarlaıdy.
Senat basshysy zań jobasyn talqylaý barysynda «Transparency International» halyqaralyq uıymynyń «Qazaqstandaǵy sybaılas jemqorlyq jaǵdaıynyń monıtorıngi» baıandamasyndaǵy málimetterdi keltirdi, onda polıtsııa, memlekettik joǵary oqý oryndary, kolledjder, balabaqshalar, sot, qala qurylysyn baqylaý, jer qatynastary, halyqty jumyspen qamtý jáne áleýmettik qorǵaý basqarmalary, áskerı komıssarıattar, kóshi-qon qyzmeti kósh bastap turǵany aıtylady. Baıandamada sonymen qatar sybaılas jemqorlyq sebepteriniń alǵashqy ondyǵy arasynda mamandarda emdelý jáne qabyldaýynda bolý; jumysqa ornalasý; jer telimin alý jáne resimdeý; balany balabaqshaǵa ornalastyrý jáne taǵy basqa máseleler bar.
«Jurtshylyq ony tezirek resimdeý úshin ǵana tóleıdi. Qazir biz «Tsıfrlyq Qazaqstan» baǵdarlamasyn belsendi túrde júzege asyryp otyrmyz. Degenmen, baıandamada keltirilgen málimetter bizde bári jaqsy emes ekenin kórsetedi», - dep túıindedi D. Nazarbaeva.
Senat basshysy osyǵan baılanysty tsıfrlyq damý, ınnovatsııalar jáne aeroǵarysh ónerkásibi mınıstriniń orynbasary Abylaıhan Ospanovtan «Bul baǵytta qandaı jumystar atqarylýda? Uzaqqa sozylýy jáne merzimderge baılanysty ne bolady? Barlyq bilim berý mekemelerinde aqparattandyrýdy jedeldetý úshin ne isteý kerek?» - dep surady.
Suraqqa jaýap bere kelip A.Ospanov qazirgi kezde memlekettik qyzmetterdi ońtaılandyrý jáne avtomattandyrý boıynsha 500-ge jýyq jol kartasy bekitilgenin habarlady. «Bul jumystar jalǵasyn tabýda, ár eki apta saıyn bizdiń komıssııanyń otyrysy bolady, barlyq eskertýler qaralady», - dedi ol.
Memlekettik qyzmetter kórsetýdegi áýre-sarsań men merziminiń saqtalmaýyna baılanysty problemalardy sheshý jóninde qandaı sharalar qoldanylǵany týraly Senat Tóraǵasynyń saýalyna memlekettik qyzmet isteri agenttigi tóraǵasynyń orynbasary Marat Dáýeshov jaýap berdi. «Tájirıbe kórsetip otyrǵandaı, memlekettik organdar mundaı qyzmetterdi kóleńkeden shyǵarýǵa múddeli emes. 2015 jyldan bastap tizilimge 170 jańa memlekettik qyzmet engizildi, onyń ishinde agenttiktiń bastamasymen 77 qyzmet usynyldy», - dedi ol.
Talqylaý qorytyndysy boıynsha Parlament Senaty memlekettik qyzmet kórsetý máseleleri boıynsha zańnamaǵa túzetýlerdi qabyldady.