Darıǵa Nazarbaeva: Qazaqstanda buryn-sońdy bolmaǵan ǵarysh ındýstrııasy qalyptasty

ASTANA. QazAqparat - Qazaqstan ǵarysh tehnologııalaryn óndirý arqyly qazynaǵa qomaqty qarajat túsire alady. Astanadaǵy Ulttyq ǵarysh ortalyǵynda bolyp qaıtqan QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva osylaı málim etti, dep habarlaıdy «QazAqparat» HAA tilshisi.

«Men búgin birinshi ret Ulttyq ǵarysh ortalyǵynda boldym. Buǵan deıin biz tek qujattar men esepterdi kórip, statıstıkany ǵana tyńdap kelip edik. Búgin ortalyqta kórgenimiz bizdiń bárimizdi shynynda da tań qaldyrdy. Bul - Qazaqstanda buryn-sońdy bolmaǵan ǵarysh ındýstrııasy. Ol búgin bizde bar. Bul biz aıtyp júrgen «Haıtek» tehnologııasy, bolashaqtyń tehnologııasy. Olardyń qajettiligi jyl sanap artyp barady», - dedi senator.

Darıǵa Nazarbaevanyń aıtýyna qaraǵanda, bir sózben, barlyq memleketter jańa ındýstrııa baǵytynda alǵa jyljyp barady.

«Bizge osy rette óte kóp bilikti mamandar kerek. Bizdiń ǵarysh tehnologııasy jyldam alǵa ketip barady. Aldaǵy 2-3 jylda bizdiń barlyq ınfraqurylymymyz, servıstik qyzmetter tyń deńgeıge kóteriledi. Bul óz kezeginde bıýrokratııalyq apparattyń kóptep qysqarýyna ákelip, memlekettik apparatty ustaýdyń shyǵynyn tómendetedi. Ekonomıka úshin de bunyń mańyzy zor. Demek, shynynda da, ǵarysh tehnologııasy úlken serpilis beredi. Búgingi kúni onyń jarqyn úlgisin biz Ulttyq Ǵarysh ortalyǵynan kórip otyrmyz», - dedi ol.

Senator óz sózinde búgingi kúni olar shetelden ákelip júrgen medıtsınalyq protezder Qazaqstanda shyǵaryla bastaǵanyn mysal etti. Demek, sheteldik ımporttyq taýardan 70 paıyzǵa arzan protezder óz elimizde óndirile bastady.

«Osy rette «Bolashaq» baǵdarlamasy óziniń jemisin berip jatqanyn atap ótkim keledi. Biz Ulttyq ǵarysh ortalyǵynda «bolashaqtyqtar» - negizgi kadrlar shoǵyry ekenin kórip otyrmyz. «Bolashaq» baǵdarlamasy boıynsha álemniń úzdik JOO-larynda tehnıkalyq bilim alǵan jastar qazir el ıgiligi úshin eńbektenip jatyr. Kadrlardy ary qaraı jetildire bergen durys. Menińshe, áli de 10 myń óte bilikti maman kerek. Sondyqtan, bilim júıesi osyǵan beıimdelip, atalǵan baǵytta granttar kóptep bólinýde», - deıdi ol.

Senator óz sózinde Qazaqstannyń ǵarysh salasy ázirge shyǵyndy óndiris ekenin, ıaǵnı ınvestıtsııa memleket tarapynan quıylyp jatqanyn atap ótti.

«Biraq, búgingi kúnniń ózinde naryqta suranysqa ıe ónimder shyǵarylyp jatqanyn kórip otyrmyz. Ýaqyt óte kele tapsyrys memleketpen birge jeke sektordan arta bastaǵannan keıin bul shynynda da, bıznes úshin tartymdy bola túsýi múmkin. Sonda ınvestorlar tartylýy yqtımal. Demek, memleket sheksiz aqsha bóle bermeıdi. Baqylaýdy memleket ózine qaldyryp, jeke berik seriktespen jumys júrgizýge bolady. Bolashaq kórsetedi. Shynynda da, bul óte eksportty óndiris», - deıdi Darıǵa Nazarbaeva.