Darıǵa Nazarbaeva elordadaǵy Oqýshylar saraıynda daýys berdi
Senat spıkeri daýys berý úshin elordadaǵy Oqýshylar saraıynda ornalasqan № 58-shi saılaý ýchaskesine keldi. Daýys berý rásiminen keıin D. Nazarbaeva Serbııadan kelgen halyqaralyq baıqaýshy Dragomır Karıchpen pikir almasty.
Aıta keteıik, bul ýchaskede 3 417 saılaýshy tirkelgen. Saǵat 07:00-den bastap bul jerde daýys berýshilerdiń belsendigin baıqaýǵa bolady.
Osy saılaý ýchaskesiniń tóraıymy Qymbat Іrgebaevanyń sózine qaraǵanda, tańerteńnen beri baıqaýshylar tarapynan eskertýler bolmady.
Eske sala ketsek, búgin Qazaqstan Prezıdentin kezekten tys saılaý bastaldy.
QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteýde. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7:00-20:00 aralyǵy) bolady. Batys Qazaqstan, Aqtóbe, Atyraý, Mańǵystaý, Qyzylorda oblystarynda ýaqyt aıyrmashylyǵyna baılanysty saılaý ýchaskeleri jergilikti ýaqyt boıynsha saǵat 07:00-de - Nur-Sultan ýaqyty boıynsha saǵat 08:00-de ashyldy.