Darıǵa Nazarbaeva álemdik dinder lıderleriniń ókilderimen kezdesti
Senattyń baspasóz qyzmetinen málim etkendeı, palata basshysy sezd Hatshylyǵynyń jumysyna belsendi qatysqany jáne kóp jyldan bergi qoldaýy úshin alǵys aıtty.
Óz kezeginde D.Safonov Qazaqstanǵa pravoslav turǵyndardy qoldaǵany úshin rızashylyǵyn bildirdi.
«Reseıdiń dinaralyq keńesi Qazaqstanǵa zor qurmetpen qaraıdy, dıalog alańynyń barlyq usynystaryn qoldap keledi jáne budan bylaıǵy yntymaqtastyqqa úmit artady. Biz dinaralyq forýmdy shaqyrýdaǵy Qazaqstannyń tájirıbesin zerdeleý úshin aldyńǵy sezderge qatysýshylardyń materıaldary men sóılegen sózderin alǵymyz keledi», - dep atap ótti D.Safonov.
Sondaı-aq Máskeý Patrıarhatynyń ókili Patrıarh Kırılldiń Qazaqstanǵa sapary 2021 jylǵa josparlanǵanyn aıtty.
Darıǵa Nazarbaeva «Ál-Azhar» ıslam zertteýleri akademııasynyń bas hatshysy Nazır Muhammed Muhammed ál-Nazır Aıadpen áńgime barysynda búkil álemdegi ıslamnyń rólin nyǵaıtýǵa, tózimdilik pen barlyq halyqty yntymaqqa shaqyratyn dinniń shynaıy, beıbitsúıgish mán-maǵynasyn nasıhattaýǵa baǵyttalǵan ál-Azhardyń kúsh-jigerin joǵary baǵalady.
«Islamnyń iri ortalyǵynda qazaqstandyq stýdentter jaqsy bilim alýda, olardy oqytýdaǵy kómekterińiz úshin rızamyz», - dep atap ótti Senat Tóraǵasy.
Sezd Hatshylyǵynyń basshysy, sondaı-aq Dúnıejúzilik ıslam lıgasy Bas hatshysynyń ókili, Kómek kórsetý, kútimge alý jáne damý máseleleri jónindegi halyqaralyq uıymynyń Bas hatshysy Ábdýlazız Ahmad Sarhanmen kezdesti. Taraptar sezdiń qyzmetin damytý, onyń jańa sapalyq deńgeıge shyǵýy jónindegi birlesken yntymaqtastyqty talqylady.
Ábdýlazız ben Ahmad Sarhan kóptegen álemdik dinder qajet etetin shynaıy beıbit alań qurǵany úshin Qazaqstan basshylyǵyna alǵysyn bildirdi.
«Siz basshylyq etetin dıalog alańy ultaralyq kelisim men ishki turaqtylyqtyń úlgisin kórsetip otyr», - dedi Dúnıejúzilik kómek kórsetý jáne damý máseleleri jónindegi uıymnyń Bas hatshysy.