Darhan Satybaldy ekinshi dúnıejúzilik soǵysynyń ardagerine qurmet kórsetti

TÚRKІSTAN. QazAqparat - Túrkistan oblysynda Ekinshi dúnıejúzilik soǵysyndaǵy Uly Jeńistiń 78 jyldyǵyna arnalǵan is-sharalar bastalyp ketti. Oblys ákimi Darhan Satybaldy 96 jastaǵy túrkistandyq ardager Ábjappar Daırabaıulynyń úıine arnaıy baryp, syı-qurmet kórsetti, dep habarlaıdy oblystyq ákimdiktiń baspasóz qyzmeti.

– Qazaq halqy – qazynaly qarııalaryn syılaǵan el. Men úshin ardagerlerimizdiń aıtqan keńesteri, aq batalary bárinen mańyzdy. Mereke qarsańynda ózińizben amandasyp, tildesýdi jón kórdim. Túrli qıyndyqtardy jeńip, memleket úshin ter tóktińizder. Biz batyr tulǵalarymyzdy baǵalap, urpaqqa úlgi-nasıhat retinde kórsetip otyrýymyz kerek. Ardagerlerdiń hal-jaǵdaıy árdaıym nazarymyzda. Tek mereke kezinde emes, barlyq ýaqytta qoldaý kórsetemiz. Amandyǵyńyzdy tileımiz, – Darhan Amangeldiuly.

Ábjappar Daırabaıuly 1927 jyly Túrkistan aýdany, Tartoǵaıda sharýanyń otbasynda dúnıege kelgen. Asharshylyq jyldary 5 jastaǵy Ábjappar densaýlyǵyna baılanysty júrýge jaramaı qalady. Qıyndyqpen ósedi.

1943 jyly 16 jasynda maıdanǵa attanyp, Belarýs, Ýkraına maıdandarynda soǵysqan, Polshany azat etýge qatysqan. «Uly Otan soǵysy» ordenimen, «Eren eńbegi úshin» jáne taǵy da basqa medaldarmen marapattalǵan.

Elge oralǵan soń ustazdyq jolda eńbek etken. Qalalyq Uly Otan soǵysy ardagerleri keńesiniń tóraǵasy boldy. Ardager 3 qyz ben 2 uldan nemere tárbıelep otyr. Qazirgi tańda uly Rústembek Daırabaevtyń shańyraǵynda turady.

Aıta keteıik, Túrkistan oblysynan Uly Otan soǵysyna 140 myńnan astam azamat attanyp, onyń 70 myńy elge oralǵan. Olardyń arasynan Keńes Odaǵynyń batyrlary, Halyq qaharmany jáne III dárejeli «Dańq» ordeniniń kavalerleri shyqqan.

2023 jyldyń 25 sáýirdegi jaǵdaıymen 4438 adam UOS ardagerleri jáne oǵan teńestirilgender esebinde. Onyń ishinde Uly Otan soǵysy ardageriniń sany – 14. Óńirde 4423 ardager jaǵdaılary boıynsha ishinara sanattarǵa bólinedi.

Jalpy, 4438 ardagerge Uly Jeńis merekesiniń qurmetine bir rettik materıaldyq kómek tóleý úshin aýdandyq, qalalyq bıýdjet esebinen 175,5 mln. teńge qarjy bólindi. UOS ardagerlerine 1,5 mln. teńgeden úlestirilse, 4400-den astam tyl eńbekkerleri men qaza bolǵan jaýyngerdiń jesirlerine jáne basqa da sanattardaǵy ardagerlerge qarjylaı kómek qarastyryldy.

Otansúıgishtikti dáripteý maqsatynda aldaǵy ýaqytta jastardyń qatysýymen is-sharalar ótkizý josparlanýda.