Darhan Myńbaı memlekettik organdardyń ınternet-resýrstaryndaǵy aqparatty synady
«Memlekettik organdardyń ınternet-resýrstarynyń monıtorıngi kórsetkendeı, bólimderdiń kópshiligi aqparatpen tolyqtyrylmaıdy, ne aqparat deklaratıvti sıpatta nemese eski bolady. Mysaly, Aýyl sharýashylyǵy mınıstrliginiń ınternet-resýrsynda: «Aýyl sharýashylyǵy ónimderiniń baǵasy» bóliminde tıisti aqparat joq, sońǵy ret 2020 jylǵy qarashada jańartylǵan. Onyń ornyna sybaılas jemqorlyq deńgeıin qysqartý boıynsha joba ornalastyrylǵan. Al Memleket basshysy Ekibastuz qalasynda ótken keńeste azyq-túlik taýarlarynyń baǵasy 10,4 paıyzǵa qymbattaǵanyn, kókónis baǵasynyń da sharyqtap turǵanyn qatty synǵa aldy», - dedi D. Myńbaı Májilistiń jalpy otyrysynda Úkimet basshysynyń orynbasary Roman Sklıardyń atyna joldaǵan saýalynda.
Onyń aıtýynsha, Іshki ister mınıstrliginiń ınternet-resýrsynda strategııalyq jospar jáne ony iske asyrý týraly esep túr, memlekettik organ qyzmetiniń tıimdiligin baǵalaý qorytyndylary joq.
Eńbek jáne halyqty áleýmettik qorǵaý mınıstrliginiń ınternet-resýrsynda: «Statıstıkalyq salalyq derekter» bóliminde tıisti aqparat joq. Onyń ornyna ázirlengen normatıvtik quqyqtyq aktiler jobalary ornalastyrylǵan.
«Taǵy bir jıi kezdesetin mysal. Qoǵamdyq densaýlyq saqtaý basqarmasynyń nemese aýrýhananyń saıtynda № 375 qaýly boıynsha habarlandyrý beriledi:
1. Satyp alý (bastalý kúni).
2. Qyzmetkerler habarlandyrýdy eń basynan jasyrady.
3. Habarlandyrý ilýli jáne kórinbeıtin rejımde turady.
4. Ótinimderdi berý kúni aıaqtalǵanda habarlandyrý iske qosylady (qoljetimdilik ashylady)», - dedi D. Myńbaı.
Zańnyń 16-babynda kvazımemlekettik sektor sýbektileri ózderiniń ınternet-resýrstarynda ornalastyrýy tıis aqparat tizbesi de kózdelgen. Soǵan qaramastan, olardyń ınternet-resýrsynyń bólimderindegi aqparattyń kópshiligi jańartylmaıdy nemese múlde tolyqtyrylmaıdy.
«Zerde» ulttyq ınfokommýnıkatsııa holdıngi» AQ ınternet-resýrsynda:
- bos laýazymdar boıynsha aqparat (jarııalanǵan bos laýazymdar, bos laýazymdarǵa ornalasý úshin kandıdattarǵa qoıylatyn biliktilik talaptary, bos laýazymdar týraly aqparat alý úshin telefon nómirleri) jazylmaǵan.
«Derekterdiń tolyqtyrylmaýy «Elektrondyq úkimet» veb-portalynda da baıqalady. Ashyq úkimet komponentterin paıdalanýshylar qaldyrǵan pikirler jaýapsyz qalady nemese olarǵa syrǵytpa jaýap beriledi. «Ashyq derekter» portalyn tolyqtyrý ylǵı keshiktiriledi. Bizdiń oıymyzsha, qajetti, obektıvti jáne shynaıy aqparattyń bolmaýy shyndyqtyń burmalanýyna ákep soqtyrady. Sondyqtan, jurtshylyq úshin, onyń ishinde BAQ qyzmetkerleri úshin obektıvti aqparatqa qol jetkizý jeńil, tez jáne tıimdi bolatyn jaǵdaılar jasaý mańyzdy. Bul kez kelgen órkenıetti qoǵam úshin jáne bizdiń elimiz úshin ózekti bolyp otyr»., - dedi ol.
Aqparatqa qoljetimdilik jaǵdaıyn jaqsartý maqsatynda, mynadaı usynystardy qaraýdy suraldy:
1) joǵaryda keltirilgen mysaldar boıynsha taldaý jasalyp, aldaǵy ýaqytta zańsyzdyqtarǵa jol bermeý mehanızmi qarastyrylsyn;
2) atalǵan Zańnyń 6-2-babyna sáıkes aqparatqa qol jetkizý salasyndaǵy ýákiletti organ mınıstrlikter men basqa kvazımemlekettik sýbektilerdiń qyzmetine monıtorıng jáne vedomstvoaralyq úılestirý boıynsha jumysyn BAQ-ta jáne áleýmettik jelilerde udaıy jarııalap otyrsyn.
3) ınternet-resýrstarda jáne «elektrondyq úkimet» veb-portalynda derekterdi jańartý úshin memlekettik organdardyń is-qımyldarynyń barynsha ashyqtyǵyn qamtamasyz etý;
4) memlekettik organdardyń aqparatqa qol jetkizý salasyndaǵy qyzmetin qoǵamdyq keńester baqylaýǵa alsyn.