Darhan Myńbaı etnıkalyq BAQ jumysyna syn bildirdi
Baılanys jáne aqparat qyzmetkerleri kúni qarsańynda uıymdastyrylǵan bul otyrysta Darhan Myńbaı asa qýatty kúsh sanalatyn BAQ arasynda etnostyq BAQ ókilderiniń orny erekshe ekenin, elimizdegi yntymaq pen birlikti qamtamasyz etýde olardyń orasan jumystar atqaratynyn atap ótti.
«Birinshiden, jýrnalıstik ortada básekege qabilettilik, pragmatızm, bilim kýlti jáne ashyqtyq kásibıliktiń negizgi alǵysharttary bolýy tıis. Ekinshiden, etnojýrnalıstıka mańyzdy jalpyhalyqtyq taqyryptar boıynsha pikir qalyptastyratyn tıimdi kanaldardyń biri bolýy kerek. Ókinishke oraı, bul taqyrypta jekelegen BAQ, onyń ishinde etnıkalyq aqparat quraldary ózderin kórsete almaı keledi. Máselen, olar asharshylyq pen saıası qýǵyn-súrgin qurbandaryn eske alý kúni aıtarlyqtaı belsendi bolǵan joq. Bul tragedııa kóptegen etnostardyń basynan ótti, bul halyqtardy biriktiretin ortaq tarıhymyz. Atalǵan taqyrypta jýrnalıster kózi tiri kýágerlerden, Germanııada, Polshada, Reseıde turyp jatqan burynǵy otandastarymyzdan suhbat alyp, óte jaqsy materıaldar bere alar edi. Ásirese, kóptegen etnos ókilderiniń, aqsaqaldardyń bastan keshken oqıǵalaryn jazyp alýyna bolar edi. Arhıvpen tyǵyz ári tıimdi jumys isteı alatyn jýrnalıster de az. Bir ǵana Qaraǵandy oblysynyń arhıvinen birneshe memlekettiń elshilikterine on myńnan astam materıal jiberildi. Jaqynda Belarýs prezıdenti A.Lýkashenko bizdiń Prezıdentke qýǵyn-súrginge qatysty materıaldar berdi. Jýyrda Qazaqstannyń «100 jańa tulǵasy» jobasy iske qosylady. Bul da jýrnalıster úshin úlken jumys alańy. Eger eresekter men mektep oqýshylary Qazaqstannyń úsh ǵaryshkerin atap bere almasa, bul jetkilikti túrde habar taratpaǵan jýrnalısterdiń kinási. Qoǵamda erlikke para-par ister atqaryp júrgen metsenattar men qarapaıym turǵyndardyń qaıyrymdy isteri de nazardan tys qalýda. Bul da jýrnalıster úshin kerek materıal. Otyrysqa qatysyp otyrǵan redaktorlar men BAQ jetekshileriniń osyǵan mán berýin suraımyn», - dedi Darhan Qamzabekuly.
Sondaı-aq, Darhan Myńbaı etnıkalyq BAQ kontentindegi teńgerimdi saqtaý máselesin kóterdi.
«Etnıkalyq BAQ jýrnalısteri óz basylymy men aýdıtorııasynda qalyp qoımaýy tıis. Olar ortalyq BAQ-ta aýysýǵa umtylýy kerek. Oǵan qosa, etnıkalyq BAQ ishkietnıkalyq jáne jalpymemlekettik taqyryptardy jarııalaýda teńgerimdi saqtaýy kerek. Іshkietnıkalyq taqyryptarǵa basymdyq berilmeýi tıis dep esepteımin. Ókinishke oraı, bul másele kóptegen etnıkalyq BAQ-ta kezdesedi jáne muny ashyq aıtý kerek. Etnıkalyq BAQ-tyń kópshiligi memlekettik aqparattyq tapsyrys aıasynda jumys isteıdi. Sondyqtan, ókiletti mınıstrlik pen «Qoǵamdyq kelisim» RMM muny baqylaýǵa alýy kerek. Taǵy aıta keterligi, árbir etnıkalyq BAQ óziniń ınternetpen jumysyna, áleýmettik jelilerde paraqshalarynyń bolýyna erekshe mán berýi tıis. Bul segment olarda jetkilikti damymaǵan jáne zamana kóshinen de qalýǵa bolmaıdy», - dedi ol.
Sonymen birge, QHA Tóraǵasynyń orynbasary Elbasynyń baǵdarlamalyq maqalasynda barsha BAQ aldyna zor mindet qoıylǵanyn, osy oraıda barlyq etnostyq BAQ-tyń qoǵamdyq sananyń jańǵyrýy boıynsha iske asyrylyp jatqan jobalardy nasıhattaýǵa laıyqty úles qosýy kerektigin atap ótti jáne tatýlyq pen birlikti nasıhattap júrgen jýrnalısterdi yntalandyrý úshin jańa baıqaý uıymdastyrýdy usyndy.
«BAQ ókilderin yntalandyrý úshin «Dostyq pen kelisimdi nyǵaıtýǵa eleýli úles qosqan tulǵalarǵa arnalǵan úzdik aqparattyq materıal», «Óńirlerdegi Assambleıa jumysynyń jańashyldyǵyn kórsetetin úzdik aqparattyq materıal» jáne «Kópultty tatý ujymǵa arnalǵan úzdik aqparattyq materıal» nomınatsııalary boıynsha baıqaý uıymdastyrýdy usynamyn», - dedi D. Myńbaı.
Aıta keteıik, Astanada Qazaqstan halqy Assambleıasynyń jýrnalıster klýbynyń «Rýhanı jańǵyrý: sananyń jańǵyrýy» atty keńeıtilgen otyrysy ótti. Onda rýhanı jańǵyrý jáne qoǵamdyq kelisim men jalpyulttyq birlikti nyǵaıtýdy aqparattyq qoldaý konteksindegi jýrnalıster qaýymy aldynda turǵan mindetter talqylandy.